აშშ-ს ხელისუფლება კრიპტო ინდუსტრიის ჩაძირვას ცდილობს

აშშ-ს ხელისუფლება კრიპტო ინდუსტრიის ჩაძირვას ცდილობს

პორტალ CoinDesk-ის სარედაქციო საბჭო, რომელიც  ფედერალური მთავრობის ბოლოდროინდელ ქმედებებზე კომენტარს აკეთებს ვარაუდობს, რომ  ხელისუფლება ციფრული აქტივების ინდუსტრიისთვის ზიანის მიყენებას ცდილობს.

საინფორმაციო პორტალ CoinDesk-ის რედაქციის ვარაუდით, აშშ-ს მთავრობისა და მარეგულირებლების ქმედებები ინდუსტრიის წარმომადგენლების საზღვარგარეთ განდევნისკენ არის მიმართული.

„რედაქციის ხელმძღვანელობას მიაჩნია, რომ ეგზისტენციალური საფრთხეები, რომლებსაც აშშ-ს კრიპტოვალუტის ინდუსტრია მთავრობის ბოლოდროინდელი ქმედებების გამო აწყდება, გარკვეული პოზიციის ჩამოყალიბებისთვის სავსებით საკმარისია.“- განაცხადეს CoinDesk-ის წარმომადგენლებმა.

დასკვნების გამოსატანად საკმარისია ფასიანი ქაღალდებისა და ბირჟების კომისიის (SEC) მხრიდან კრიპტო ბირჟების – Kraken-ისა და Coinbase-ის წინააღმდეგ მიმართული ქმედებები. ასევე სასაქონლო ფიუჩერსების სავაჭრო კომისიის მხრიდან (CFTC) Binance-ის წინააღმდეგ  სასამართლო პროცესის დაწყება.

სიტუაციას ასევე ამძიმებს პრეზიდენტის ეკონომიკურ ანგარიშში გაჟღერებული პოლიტიკური განცხადება, რომელიც გასულ კვირას აშშ-ს პრეზიდენტის ადმინისტრაციამ გამოაქვეყნა.

მასში ნათქვამია, რომ კრიპტოვალუტა არ წარმოადგენს სასარგებლო ტექნოლოგიას და ბოლო დროს სახიფათო დანაშაულებრივი მაქინაციების წყაროდ იქცა.

ავტორიტეტული გამოცემის ჟურნალისტების რწმენით, აშშ-ის მთავრობა და მარეგულირებლები ეროვნულ კრიპტო კომპანიებს საზღვარგარეთ გადასვლაზე ფიქრისკენ უბიძგებენ.

კომპანიებს შიში აქვთ,  რომ სამშობლოში ისინი არა მხოლოდ ბიზნესს დაკარგავენ, არამედ საკუთარ საბანკო ანგარიშებზე წვდომაც შეეზღუდებათ.

CoinDesk-ის სარედაქციო კოლეგიას მიაჩნია, რომ აშშ-ს მთავრობის ბოლოდროინდელი ქმედებები უფრო სადამსჯელო იყო, ვიდრე კონსტრუქციული.

ამიტომ, ჯოზეფ ბაიდენის ადმინისტრაციისა და სამეთვალყურეო ორგანოების მხრიდან მნიშვნელოვანი ცვლილების გატარების გარეშე, რთული იქნება ბაზრის მონაწილეებისა და მომხმარებლების დარწმუნება, რომ მთავრობის პოლიტიკა კრიპტოვალუტის ინდუსტრიის წინააღმდეგ არ არის მიმართული.