აშშ ციფრული დოლარის შესაძლო კონკურენტებს იცილებს

სენატორი ბილ ჰეგერტი:  Binance-ისა და Coinbase-ის წინააღმდეგ სასამართლო პროცესები ციფრული დოლარისთვის გზის გაკვლევას ემსახურება.

ტენესის შტატის სენატორის ვარაუდით, აშშ-ს ფასიანი ქაღალდებისა და ბირჟების კომისიის  Binance-ისა და Coinbase-ის  წინააღმდეგ აღძრული საქმეების ჭეშმარიტ მიზანს სახელმწიფო ციფრული ვალუტის შესაძლო კონკურენტების აღმოფხვრა წარმოადგენს.

სენატის საბანკო კომიტეტის წევრმა ბილ ჰეგერტიმ (Bill Hagerty) თავის ტვიტერზე დაწერა რომ სავარაუდოდ,

SEC-ის ბოლო სასამართლო პროცესების რეალური მიზანი, შესაძლოა არსებული ყველა კრიპტო პლატფორმის  შეერთებული შტატების იურისდიქციის ფარგლებს გარეთ გადატანა იყოს.

კონგრესმენის თქმით, SEC კრიპტოვალუტის ინდუსტრიის წინააღმდეგ მიზანმიმართულ ბრძოლას მხოლოდ იმ მიზეზით აწარმოებს,

რომ შესაძლო კონკურენტები ჩამოიცილოს და სფერო ცენტრალური ბანკის ციფრული ვალუტის (CBDC) დანერგვისთვის გაწმინდოს.

„როგორც იქნა გერი გენსლერმა თავისი რეალური სახე გამოაჩინა და გაახმოვანა, რომ ბაიდენის ადმინისტრაციას ბაზრის ინოვაციების მოსპობა სურს, რათა გზა გაუხსნას CBDC-ს, რომელიც ფედერალურ მთავრობას მოქალაქეების კონფიდენციალურობაში უპრეცედენტო ჩარევის შესაძლებლობას მისცემს.“- განაცხადა სენატორმა.

ამ დღეებში SEC-ის თავმჯდომარემ გერი გენსლერმა  CNBC-სთვის მიცემულ ინტერვიუში ხაზი გაუსვა, რომ აშშ-ს არ სჭირდება კრიპტო აქტივები, რადგან ქვეყანას  საკუთარი ციფრული დოლარი უკვე აქვს.

მანამდე, ბილ ჰეგერტიმ და სენატორმა სინტია ლამისმა (Cynthia Lummis) კრიპტო ინდუსტრიის რეგულირებასთან დაკავშირებით SEC-ის არაკონსტრუქციული მიდგომა გააკრიტიკეს და განაცხადეს,

რომ სააგენტო ინოვაციებს ახშობს  და ინვესტორებს ზიანს აყენებს.