ბაზრის კრახი კრიპტოვალუტის შესაძენად შესაფერისი დროა

ბაზრის კრახი კრიპტოვალუტის შესაძენად შესაფერისი დროა

კრიპტოვალუტის ბირჟა Binance-ის აღმასრულებელმა დირექტორმა  კრიპტოვალუტის ბაზრის ამჟამინდელ დაცემას  ბიტკოინის გრძელვადიანი პერსპექტივით შესაძენად შესაფერისი დრო უწოდა.

ჩენპენ ჯაოს (Changpeng Zhao) განცხადებით,  ტრეიდერებმა დათვების ბაზრის დროს მეტი ბიტკოინის ყიდვა უნდა განიხილონ.

Binance-ის ხელმძღვანელმა მაგალითად კომპანია MicroStrategy მოიყვანა, რომელმაც 29 ივნისს 20,817 აშშ დოლარის კურსით 10 მილიონი დოლარის ღირებულების 480 BTC შეიძინა. მიუხედავად იმისა, რომ ბაზრის დაცემის გამო კომპანიის ზარალმა 1,2 მილიარდ დოლარზე მეტი შეადგინა, MicroStrategy-ის ხელმძღვანელი მაიკლ სეილორი (Michael Saylor) ბიტკოინის მხარდაჭერას აგრძელებს.

ჯაომ ასევე სალვადორის პრეზიდენტი ნაიბ ბუკელე (Nayib Bukele) მოიხსენია, რომელმაც ცოტა ხნის წინ სახელმწიფო ხაზინას კიდევ 80 BTC შემატა.

ჯაოს თქმით, თუ ტრეიდერები შეძლებენ  ბაზარზე მიმდინარე დათვების ტრენდს გაუძლონ, მათი ინვესტიციები  მომდევნო ხარების ტრენდის დროს გაიზრდება:

„კრიპტოვალუტები არსად წავა. თუ ინდუსტრიის  ხუთი, ათი და თუნდაც ოცი წლის პროგნოზს გავაკეთებთ, შემუშავებული იქნება სულ უფრო მეტი აპლიკაცია, ინდუსტრიაში კი სულ უფრო მეტი ადამიანი მოვა.“

Binance-ის აღმასრულებელი დირექტორი დეცენტრალიზებული ფინანსების (DeFi) მიმართ ოპტიმისტურად არის განწყობილი.

ის დარწმუნებულია, რომ უახლოეს ხუთ-ათ წელიწადში დეცენტრალიზებულმა ბირჟებმა შესაძლოა ცენტრალიზებულ ბირჟებს გადაუსწრონ, თუმცა ეს უკანასკნელნი ბაზრის მნიშვნელოვან სეგმენტს მაინც დაიკავებენ. ამასთან ჯაოს თქმით, ვაჭრობა უმეტესად მაინც  DeFi-ის მეშვეობით განხორციელდება.

მან დასძინა, რომ Binance-ს არ სურს ბანკი ან ისეთი მონოპოლისტი გახდეს, როგორც Facebook-ია.

მისი თქმით, თუ ბირჟას  რომელიმე გიგანტს შევადარებთ, მაშინ მომხმარებლებისთვის Web3-ის ინსტრუმენტების შეთავაზებით, Binance ცდილობს უფრო Google-ს დაემსგავსოს.

ჯაომ ბიტკოინს  ყველაზე დეცენტრალიზებული კრიპტოვალუტა უწოდა. მან ცოტა ხნის წინ განაცხადა, რომ ბაზრის რყევები ნორმალური მოვლენაა და ივარაუდა, რომ 2024 წლისთვის ბიტკოინმა შესაძლოა თავის ყველა დროის მაქსიმუმს, $69,000-ს გადააჭარბოს.