ბაიდენის ადმინისტრაცია კრიპტო ინდუსტრიას მიზანმიმართულად ანადგურებს

ბაიდენის ადმინისტრაცია კრიპტო ინდუსტრიას მიზანმიმართულად ანადგურებს

Cardano-ს დამფუძნებელმა ჩარლზ ჰოსკინსონმა შეერთებულ შტატებში კრიპტო ინდუსტრიის გასანადგურებლად მიმართული ერთობლივი ძალისხმევის გამო ჯო ბაიდენის ადმინისტრაცია გააკრიტიკა.

ჩარლზ ჰოსკინსონი (Charles Hoskinson) მის მიერ ახლახანს გამოქვეყნებულ ვიდეოში აცხადებს, რომ ბოლო რამდენიმე წლის განმავლობაში აშშ-ს მთავრობა კრიპტო ინდუსტრიას ყოველმხრივ ზიანს აყენებს. ის განსაკუთრებით კრიპტო კომპანიებისთვის საბანკო ანგარიშებზე წვდომის შეზღუდვასა და აშშ-ს ფასიანი ქაღალდებისა და ბირჟების კომისიის (SEC) ციფრულ აქტივებთან დაკავშირებით მკაცრი პოლიტიკის გატარებას აღნიშნავს. ჰოსკინსონის თქმით, თეთრი სახლი ახალი კანონების შემოღებას, რომლებიც ინდუსტრიაში ჩართული კომპანიების საქმიანობას დაარეგულირებს, მიზანმიმართულად აფერხებს.

ჰოსკინსონმა კომენტარი მას შემდეგ გააკეთა, რაც პრეზიდენტის ადმინისტრაციამ განაცხადა, თითქოს ბაიდენი აპირებს ვეტო დაადოს კანონს, რომლის მიხედვით SEC-ის მხრიდან ბანკებისთვის კრიპტოვალუტის ფლობაზე დაწესებული შეზღუდვები უნდა გაუქმდეს.

ცოტა ხნის წინ თეთრმა სახლმა უარი განაცხადა საბუჰალტრო აღრიცხვის რეგულაცია SAB 121-ის გაუქმებაზე, რომელიც კრიპტო აქტივების შენახვის მსურველ ორგანიზაციებს უმკაცრეს პირობებს უწესებს. მიზეზად SEC -ის მხრიდან კრიპტო ბაზრებზე ინვესტორების უფლებებისა და ზოგადად საფინანსო სისტემის დაცვის შეუძლებლობა დასახელდა. გარდა ამისა, ჰოსკინსონმა SEC-ი კრიპტოვალუტების, როგორც ახალი კლასის აქტივების მიმართ დრომოჭმული კანონმდებლობის გამოყენებისთვის გააკრიტიკა.

„ბაიდენისთვის ხმის მიცემა ამერიკული კრიპტოვალუტის ინდუსტრიის წინააღმდეგ ხმის მიცემის ტოლფასია. ოფიციალური პირების განცხადებით, 1933 წელს მიღებული ბირჟების შესახებ კანონი საკმარისია იმ აქტივების დასარეგულირებლად, რომლებიც 90 წლის შემდეგ გაჩნდა. ეს აბსურდია.“ – განაცხადა Cardano-ს დამფუძნებელმა.

ჰოსკინსონმა შედარებისთვის ის იურისდიქციები მოიყვანა, რომლების კრიპტო კომპანიებს მიესალმებიან.  შვეიცარიამ, სინგაპურმა და დუბაიმ 3000-ზე მეტი კრიპტო კომპანიისგან მილიონობით დოლარის სარგებელი უკვე მიიღეს. ჰოსკინსონის აზრით, რომ არა კროპტოვალუტების რეგულირების მკაცრი პოლიტიკა, ეს კომპანიები აშშ-იც შეძლებდნენ მოღვაწეობას.