ბენკმენ-ფრიდი ციხის დაცვას კრიპტოვალუტების შესახებ რჩევებს აძლევს

ბენკმენ-ფრიდი ციხის დაცვას კრიპტოვალუტების შესახებ რჩევებს აძლევს

The Wall Street Journal-ის ცნობით, თაღლითობისთვის გასამართლებული კრიპტო ბირჟა FTX-ის ყოფილი ხელმძღვანელი სემ ბენკმენ-ფრიდი თავისუფალ დროს ციხის დაცვის თანამშრომლებისთვის კრიპტო ბაზრის შესახებ კონსულტაციის გაწევას უთმობს.

როგორც WSJ საკუთარ წყაროებზე დაყრდნობით წერს, ბენკმენ-ფრიდი საკანში ჰონდურასის ყოფილ პრეზიდენტთან და მექსიკის ყოფილ პოლიციის უფროსთან ერთად იმყოფება. FTX-ის დამფუძნებლის მთავარ „ვალუტას“ ახლა სკუმბრიის ქილა წარმოადგენს, რომელიც აშშ-ში „ციხის ვალუტად“ სიგარეტის აკრძალვის შემდეგ ითვლება. თუმცა, ის თავის ყოფილ საქმიანობას არ ივიწყებს და ციხის დაცვას კრიპტოვალუტებზე რჩევებს აძლევს.

ციხის წარმომადგენელმა კონფიდენციალურობისა და უსაფრთხოების დაცვის მიზეზით, პატიმრობაში მყოფი პირის პირობების შესახებ კომენტარის გაკეთებაზე უარი განაცხადა. მისი თქმით, ციხე პატიმართა უსაფრთხოების უზრუნველსაყოფად ძალისხმევას არ იშურებს.

სემ ბენკმენ-ფრიდის (Sam Bankman-Fried) წარმომადგენლის, მარკ ბოტნიკის (Mark Botnick) თქმით:

„სემი აკეთებს მაქსიმუმს, რისი გაკეთებაც მოცემულ პირობებში შეუძლია.“

კრიპტოვალუტის ბირჟის ყოფილ ხელმძღვანელს ახლა ვეგეტარიანულ საკვებსა და იმ მედიკამენტებზე წვდომა აქვს, რომლებსაც ის ყურადღების დეფიციტის სინდრომისა და ჰიპერაქტიურობის გამო იღებს. თავდაპირველად, FTX-ის დამფუძნებელს ციხეში თავის გატანა არაქისის კარაქით, პურითა და წყლით უწევდა, რადგან ციხე მის ვეგეტარიანულ დიეტას ვერ უზრუნველყოფდა.

შეგახსენებთ, რომ 2 ნოემბერს ნაფიცმა მსაჯულებმა ბენკმენ-ფრიდი დამნაშავედ მის წინააღმდეგ წარდგენილ შვიდივე ბრალდებაში ცნეს. ერთი დღით ადრე სააპელაციო სასამართლომ ბენკმენ-ფრიდის დროებითი გათავისუფლების შესახებ არცერთი მოთხოვნა არ დააკმაყოფილა.

FTX-ის ყოფილი ხელმძღვანელი პატიმრობაში 2024 წლის 28 მარტამდე, განაჩენის საბოლოო გამოტანამდე დარჩება.