ბიტკოინის ფასი 50,000 დოლარამდე დაეცემა Standard Chartered

ბიტკოინის ფასი 50,000 დოლარამდე დაეცემა Standard Chartered

ბანკ Standard Chartered-ის ციფრული აქტივების კვლევის ხელმძღვანელმა ჯეფრი კენდრიკმა (Geoffrey Kendrick) მაკროეკონომიკური პირობების გაუარესებისა და ბაზრის განწყობის შესუსტების გამო, ბიტკოინისა და ეთერიუმის ფასების მნიშვნელოვანი ვარდნა იწინასწარმეტყველა.

მისი შეფასებით, ბიტკოინის ფასი შესაძლოა უახლოეს მომავალში დაახლოებით 26%-ით, 67,000 დოლარიდან 50,000 დოლარამდე შემცირდეს, ხოლო ეთერიუმს დაახლოებით 29%-იანი ვარდნის რისკი ემუქრება, ის შესაძლოა 1,950 დოლარიდან 1,400 დოლარამდე შემცირდეს.

კენდრიკი შესაძლო ვარდნას აშშ-ის ეკონომიკის შესუსტებას და ფედერალური რეზერვის მიერ საპროცენტო განაკვეთების შემცირების, სულ მცირე, ივნისამდე გადადებას მიაწერს. ბაზარზე დამატებით ზეწოლას ბიტკოინთან და ეთერიუმთან დაკავშირებულ გაცვლით სავაჭრო ფონდებში (ETF) სახსრების შემოდინების შემცირება ახდენს. მიუხედავად იმისა, რომ ეს საინვესტიციო ინსტრუმენტები ადრე ბაზრის ზრდას უწყობდა ხელს, ახლა ბევრი სავაჭრო სესია წმინდა გადინებით მთავრდება.

გასულ კვირას, ტექნოლოგიური აქციებისა და ძვირფასი ლითონების ფასების კლების ფონზე, ბიტკოინის ფასი 60,000 დოლარამდე დაეცა – რაც 16 თვის მინიმუმია, ხოლო ეთერიუმის ფასი კი – 1,751 დოლარამდე, რაც ცხრა თვის მინიმუმს შეადგენს. ორივე აქტივი მოგვიანებით ნაწილობრივ აღდგა, თუმცა ანალიტიკოსის თქმით, ისინი კვლავ დაღმავალი ზეწოლის ქვეშ რჩებიან, რადგან ინვესტორების მხრიდან მაღალი რისკის აქტივებისადმი ინტერესი მცირდება.

მოკლევადიანი რისკების მიუხედავად, Standard Chartered-ის გრძელვადიანი პროგნოზი უცვლელი რჩება. ბანკი ვარაუდობს, რომ 2030 წლის ბოლოსთვის ბიტკოინის ფასი 500 000 დოლარს, ეთერიუმის – 40 000 დოლარს, ხოლო Solana-ს – 2 000 დოლარს მიაღწევს.

2024 წელს, აშშ-ის საპრეზიდენტო არჩევნების წინ კენდრიკმა იწინასწარმეტყველა, რომ დონალდ ტრამპის გამარჯვების შემთხვევაში ბიტკოინის ფასი 150 000 დოლარს გადააჭარბებდა, რაც, მისი აზრით, შესაძლოა აღმავალი ტენდენციის დასაწყისი ყოფილიყო. ცოტა ხნის წინ, ანალიტიკოსმა  Solana-სთან დაკავშირებულ პროგნოზს გადახედა და წლის ბოლომდე ნავარაუდევი 310 დოლარი 250 დოლარით შეცვალა.

წყარო: https://x.com/DeItaone/status/2021926842957996061