ბიტკოინის ჰალვინგი ინდუსტრიისთვის დიდი გამოცდა იქნება

ბიტკოინის ჰალვინგი ინდუსტრიისთვის დიდი გამოცდა იქნება

Marathon Digital-ის განცხადებით, ბიტკოინის მოახლოებული ჰალვინგი ინდუსტრიას გამოცდის და ყველაზე ეფექტურ და ფინანსურად სტაბილურ კომპანიებს გამოავლენს.

Marathon Digital-ის განვითარების დირექტორის, ადამ სვიკის (Adam Swik) თქმით, კომპანია ამ მოვლენისთვის განსაკუთრებულად ემზადება და მას მნიშვნელოვან სტრეს ტესტად მიიჩნევს. მისი თქმით, დაბალი მოგების მქონე მაინინგ საწარმოებს ჰალვინგის შემდეგ შესაძლოა პრობლემები შეექმნათ, ზოგი მათგანი კი საერთოდ დაიხუროს და ბაზრიდან წავიდეს.

Stronghold Digital Mining-ის აღმასრულებელ დირექტორს, გრეგ ბერდს (Greg Beard) კი მიაჩნია, რომ ჰალვინგი აიძულებს მაინერებს ადაპტირდნენ და უფრო ენერგოეფექტურ აღჭურვილობაზე გადავიდნენ. მისი აზრით, რიგი კომპანიები ახალი კომპიუტერული აღჭურვილობის შესაძენად ბიტკოინებს დოლარზე გადაცვლიან.

ანალოგიურ მოსაზრებას იზიარებს ადამ სვიკიც. ის დარწმუნებულია, რომ ზოგიერთი მაინერი, რომელსაც საკმარისი ფინანსური რესურსი არ გააჩნია, ბაზარზე დასარჩენად საკუთარ ბიტკოინის რეზერვებს გაყიდის.

Galaxy Digital-ის ექსპერტების წინასწარი შეფასებით, ბლოკის მაინინგის ჯილდოს შემცირების შემდეგ ბიტკოინის ქსელის მთლიანი გამოთვლითი სიმძლავრის 15-20% წამგებიანი გახდება.

დეცენტრალიზებული ბირჟა D8X-ის თანადამფუძნებლის ბაზილე მაირის (Basile Maire) განაცხადებით კი კრიპტო საზოგადოება ბიტკოინის ჰალვინგის შედეგებს ბოლომდე ვერ აცნობიერებს და მიაჩნია, რომ BTC სისტემა შოკურ მდგომარეობაშია.