ბიტკოინი ან მილიონამდე გაიზრდება ან ნულამდე დაეცემა

ბიტკოინი ან მილიონამდე გაიზრდება ან ნულამდე დაეცემა

MicroStrategy-ის დამფუძნებელმა მაიკლ სეილორმა (Michael Saylor) ბიტკოინის კურსის შესახებ ორმხრივი პროგნოზი გააკეთა:

ის ან ნულამდე ჩამოვა, ან 1 მილიონ დოლარამდე გაიზრდება და მთავარ „ინსტიტუციონალურ“ აქტივად იქცევა.

CNBC-ზე საუბრისას მაიკლ სეილორმა ბიტკოინს უწოდა აქტივი, რომელსაც მსოფლიო მასშტაბით საინვესტიციო სტრატეგიების შეცვლა შეუძლია.

სეილორის აზრით, 1 მილიონი დოლარის ნიშნულამდე მიღწევა ბიტკოინის ლეგიტიმურობაზე და მასზე მსხვილი კომპანიების მხრიდან არსებულ მოთხოვნაზეა დამოკიდებული.

თუ პირველი კრიპტოვალუტა ფინანსური ინსტიტუტების ნდობის მოპოვებას გააგრძელებს, მისი კურსი სწრაფად გაიზრდება.

სეილორმა ხაზგასმით აღნიშნა, რომ ბიტკოინს ციფრული აქტივის რანგში უნიკალური უპირატესობები გააჩნია, როგორიცაა მისი დეცენტრალიზებული ბუნება, მონეტების შეზღუდული მიწოდება და მსოფლიოს მასშტაბით მისი დამკვიდრების ზრდადობა.

MicroStrategy-ის დამფუძნებელმა აღიარა, რომ მისი პროგნოზი „ნული ან მილიონი“ კრიპტოვალუტის ბაზრის არასტაბილურობას უკავშირდება.

მან აღნიშნა, რომ დღესდღეობით ინსტიტუტების უმეტესობა ბიტკოინს სათანადოდ არ აფასებს და იმისათვის, რომ ბიტკოინი ინსტიტუციონალური პორტფელების ძირითად აქტივად გადაიქცეს, მასში მიმდინარე ინვესტიციები საკმარისი არ არის.

თუმცა, სულ უფრო მეტი ინსტიტუტი იწყებს საინვესტიციო სტრატეგიების შეცვლას, ცდილობს გაზარდოს ბიტკოინის ექსპოზიცია გრძელვადიანი ზრდის მოლოდინში.

„თუ ბიტკოინი ნულისკენ არ მიემართება, ის 1 მილიონ დოლარს მიაღწევს. თუ ის ინსტიტუციური ინვესტორებისთვის ლეგიტიმურ აქტივს წარმოადგენს, მას სათანადო ყურადღება არ ეთმობა.“ – თქვა სეილორმა.