ბიტკოინი და ალტკოინები ეროვნულ ვალუტას ვერ ჩაანაცვლებენ

ბიტკოინი და ალტკოინები ეროვნულ ვალუტას ვერ ჩაანაცვლებენ

Ethereum-ის თანადამფუძნებლის აზრით,  სახელმწიფო ვალუტები ფინანსების ყველაზე დომინანტურ ფორმად დარჩება. ციფრულმა აქტივებმა კი ნაკლებად სავარაუდოა მათი სრულფასოვანი ჩანაცვლება შეძლონ.

Reuters-ის ცნობით, კრიპტოვალუტის ბაზრის დაცემისა და პანიკის ფონზე, ვიტალიკ ბუტერინმა განაცხადა, რომ მიუხედავად გლობალური ეკონომიკის უარყოფითი ტენდენციებისა, ციფრულ აქტივებს არ აქვთ შანსი ფიატურ ვალუტებზე უპირატესობა მოიპოვონ.

მისი სიტყვები ეწინააღმდეგება ანალიტიკოსების მოსაზრებას, რომლის მიხედვითაც ისეთმა ვალუტებმა, როგორიცაა დოლარი და ევრო, შესაძლოა მსყიდველობითი უნარი დაკარგონ, რადგან ინვესტორებს კაპიტალის შესანარჩუნებლად ყურადღება ალტერნატიულ აქტივებზე გადააქვთ.

„სცენარი, რომელშიც ბიტკოინი და ალტკოინები ტრადიციულ ფულზე დომინირებენ, ნაკლებად სავარაუდოა. არ მაქვს მოლოდინი, რომ კრიპტოვალუტები მსოფლიოს დაიპყრობენ.“- თქვა ვიტალიკ ბუტერინმა.

გასულ წელს ანალოგიური მოსაზრება საბერძნეთის ყოფილმა ფინანსთა მინისტრმა იანის ვარუფაკისმაც  (Yanis Varoufakis) გამოთქვა.

მისი აზრით, ბიტკოინის მიერ  სახელმწიფო ვალუტის ჩანაცვლება ნამდვილი კატასტროფა იქნებოდა. მთავარი მიზეზი, რის გამოც ეს შეუძლებელია ბიტკოინის შეზღუდული რაოდენობაა.

საგანგებო სიტუაციის შემთხვევაში, როგორიცაა მაგალითად პანდემია, ბიტკოინის მიწოდება ვერ გაიზარდება.

განსხვავებით ჩვეულებრივი ფულისგან, რომლის მიწოდების გაზრდაც მთავრობებს შეუძლიათ.

მაისში მეორე კრიპტოვალუტის დამფუძნებელმა დაწერა, რომ კრიპტოვალუტის ბაზრის დაცემის გამო მას მილიარდერს ვეღარ უწოდებენ. ბუტერინმა ასევე ტვიტების სერია გამოაქვეყნა, სადაც გამომწერებს მოუყვა თუ რა თრგუნავს ყველაზე მეტად კრიპტო ინდუსტრიაში.