ბიტკოინი მორიგი რბოლისთვის ემზადება

„ბიტკოინი მორიგი რბოლისთვის ემზადება“- დენ მორჰედი.

Pantera Capital-ის აღმასრულებელი დირექტორის დენ მორჰედის აზრით,  კრიპტო „ზამთარი“  მალე დასრულდება და ბიტკოინის კურსი წლის განმავლობაში დაახლოებით 2,5-ჯერ გაიზრდება.

Bloomberg-თან ინტერვიუში, დენ მორჰედმა (Dan Morehead) განაცხადა, რომ ბიტკოინი ახალი „რალისთვის“ ემზადება.

კრიპტოვალუტის ბაზრის ხანგრძლივი კლების  მიუხედავად, მორჰედი ოპტიმისტურად არის განწყობილი.

მისი აზრით, კრიპტო აქტივების აღმავლობა და ვარდნა ბაზარზე სრულიად ნორმალური მოვლენაა და მაგალითად ბაზრის  2018 წლის ვარდნა მოჰყავს, რომელსაც მომდევნო წლებში ზრდის ტენდენცია მოჰყვა.

მისი პროგნოზით, ბიტკოინი წელიწადში დაახლოებით 2,5-ჯერ გაიზრდება.

„ჩვენ ბაზრის დაცემის  სამი დიდი  ციკლი გავიარეთ. ვფიქრობ, რომ ივნისში მინიმალური მაჩვენებელი დაფიქსირდა და ახლა ბაზარი ზრდისთვის ემზადება.

რა თქმა უნდა ეს ადვილი არ იქნება და შეიძლება გარკვეული დრო დასჭირდეს, მაგრამ ჩვენ რბოლის შემდეგ ეტაპზე ვართ“- განაცხადა მორჰედმა.

Pantera Capital-ის დირექტორმა აღნიშნა, რომ ორი უდიდესი კრიპტოვალუტის – ბიტკოინისა და ეთერიუმის უპირატესობამ შესუსტება დაიწყო. ამიტომ ინვესტორებმა ყურადღება  სხვა კრიპტო აქტივებს უნდა მიაქციონ, რადგან ბევრი მნიშვნელოვანი პროექტი შეიძლება  ბევრად უფრო სწრაფად განვითარდეს.

მორჰედის თქმით, წავიდა  ის დრო, როდესაც ბიტკოინს კრიპტოვალუტის ბაზრის 100% ეკავა და შემდეგ ის ეთერიუმთან გაიზიარა.

ახლა ეს გიგანტები სხვა სასარგებლო პროექტებმა ჩაანაცვლეს, რომელთა კონცეფცია ბიტკოინისა და ეთერიუმისგან განსხვავდება.

მორჰედის პროგნოზს არ ეთანხმება Galaxy Digital-ის აღმასრულებელი დირექტორი მაიკლ ნოვოგრაცი (Michael Novogratz). მას მიაჩნია, რომ წლის ბოლომდე ბიტკოინი  20,000$-დან 30,000$-მდე დაბალანსდება.