ბიტკოინი სირთულეებს დამოუკიდებლად უმკლავდება

ბიტკოინი სირთულეებს დამოუკიდებლად უმკლავდება

ინვესტორისა და მილიარდერის აზრით, ბიტკოინი როგორც პროექტი, ცენტრალიზებული კრიპტოვალუტის პროექტებისგან ფუნდამენტურად განსხვავდება და ფუნქციონირება შეფერხებების გარეშე შეუძლია.

CNBC-თან ინტერვიუში ბილ მილერმა (Bill Miller) განაცხადა, რომ ბიტკოინს არაფერი აქვს საერთო ისეთ ორგანიზაციებთან, როგორიცაა FTX და Celsius Network, რომელთა დაშლამაც კრიპტოვალუტის ინდუსტრიიდან ბევრი პოტენციური ინვესტორი დააფრთხო.

FTX-ისა და Celsius-ის წარუმატებლობა დიდწილად იმან განაპირობა,  რომ მათი საქმიანობა საკუთარ მენეჯმენტზე იყო დამოკიდებული, რასაც ბიტკოინის ბლოკჩეინზე ვერ ვიტყვით.

მილერმა ყურადღება პანდემიის პერიოდის ტრადიციულ ბაზარზე გაამახვილა, როდესაც აშშ-ს ფედერალურ რეზერვს (Fed) ლიკვიდობისთვის ბრძოლაში ჩარევა და დიდი რაოდენობით ფულის დაბეჭდვა მოუწია.

„ფედერალურმა რეზერვმა ბაზარს სამაშველო რგოლი გადაუგდო, მაშინ, როცა ბიტკოინი სირთულეებს დამოუკიდებლად გაუმკლავდა. პირველი კრიპტოვალუტით ვაჭრობა უწყვეტად ხდება და ბაზარზე ჯერ შეფერხება არ ყოფილა.“

ინვესტორი პირველი კრიპტოვალუტის ვოლატილობის საკითხსაც შეეხო, რის გამოც მას ტრადიციულ აქტივებში ინვესტირების მომხრეები ყველაზე ხშირად აკრიტიკებენ.

მილერმა ხაზგასმით აღნიშნა, რომ გასული თვის განმავლობაში ბიტკოინი გაცილებით ნაკლებად ვოლატილური იყო, ვიდრე საფონდო ბაზარი.

ბირჟა FTX-ის კრახთან დაკავშირებით შექმნილი ვითარების მიუხედავად, ბიტკოინი საბაზრო კაპიტალიზაციის მიხედვით კვლავაც ლიდერად რჩება.

ბიტკოინის საბაზრო კაპიტალიზაციის მაჩვენებელი ამჟამად  331.9 მილიარდ დოლარს აღწევს, თავად მონეტის კურსი კი 17.200 დოლარზე მეტს შეადგენს.

მილერმა ბიტკოინის სასარგებლოდ გასულ წელსაც ისაუბრა და მას ფინანსურ სერვისებზე წვდომის ისეთი ინსტრუმენტი უწოდა, რომელიც  თავის ეფექტურობას სამხედრო კონფლიქტებისა და ეკონომიკური კრიზისის დროსაც კი არ კარგავს.