ბიტკოინი ხალხს ფინანსური კრახისგან გადაარჩენს

ბიტკოინი ხალხს ფინანსური კრახისგან გადაარჩენს

აშშ-ს პრეზიდენტობის კანდიდატმა რობერტ კენედი უმცროსმა ბიტკოინს უსაფრთხო ნავსაყუდელი უწოდა, რომელიც დეცენტრალიზაციის წყალობით ტრადიციული ფინანსებისთვის დამახასიათებელ რისკებს ნაკლებად ექვემდებარება.

რობერტ კენედი უმცროსმა (Robert Kennedy Jr) ტვიტი გამოაქვეყნა, რომელშიც აშშ-ს ფინანსურ ინსტიტუტებს შორის მყისიერი გადახდების პლატფორმა FedNow მოიხსენია.

ამერიკელი ოფიციალური პირების განცხადებით, FedNow ციფრული დოლარის დანერგვისკენ გადადგმული პირველი ნაბიჯი იქნება, მაგრამ კენედის ამაში ეჭვი ეპარება, რადგან პრეზიდენტ ჯო ბაიდენის ადმინისტრაცია კრიპტოვალუტების მიმართ მტრულად არის განწყობილი.

კენედი წერს, რომ 2008-დან 2022 წლამდე აშშ-ს ფედერალური სარეზერვო სისტემა (Fed) დიდ ბანკებთან თანამშრომლობდა, რათა ამ წლების განმავლობაში დაახლოებით 10 ტრილიონი დოლარი დაებეჭდა, რითაც სარგებელი მხოლოდ „ ბანკსტერებმა “ ნახეს.

კენედის თქმით, სწორედ ამიტომ უჭერს ის მხარს ბიტკოინისა და სხვა კრიპტოვალუტების გამოყენებას, რომლებიც ტრადიციული ფინანსური სისტემის ალტერნატივა შეიძლება გახდეს.

პოლიტიკოსი დარწმუნებულია, რომ ამჟამინდელი „ ფინანსური ბუშტი“ აუცილებლად გასკდება და საზოგადოებას მხსნელად კრიპტოვალუტები მოევლინება.

კრიპტო აქტივების დეცენტრალიზებული ბუნების გამო, ისინი ტრადიციული ფინანსური სისტემის მიღმა მოქმედებენ და შესაბამისად, იგივე რისკებსა და საფრთხეებს არ ექვემდებარებიან.

კრიპტოვალუტები თავისუფალია მთავრობების ზეგავლენისგან, რომლებსაც ცენტრალური ბანკების ციფრული ვალუტების მეშვეობით, თავიანთი ძალაუფლების ბოროტად გამოყენება შეუძლიათ, წერს კენედი.

„ბიტკოინის მსგავსი კრიპტოვალუტები, ადამიანებს შესაძლებლობას აძლევენ ფინანსური ბუშტის გარდაუვალი აფეთქებების დროს საფრთხეს თავი აარიდონ “ – თქვა აშშ-ს პრეზიდენტობის კანდიდატმა.

ბიტკოინის მხარდასაჭერად არაერთხელ გამოსულა ამერიკელი სენატორი სინტია ლამისიც (Cynthia Lummis) – ის დარწმუნებულია, რომ პირველი კრიპტოვალუტა მზარდი ინფლაციის პირობებში დანაზოგის შენარჩნებას შეუწყობს ხელს.