ბიტკოინმა სალვადორში ფართო გამოყენება ვერ მოიპოვა

ბიტკოინმა სალვადორში ფართო გამოყენება ვერ მოიპოვა

სალვადორის პრეზიდენტ ნაიბ ბუკელეს განცხადებით, ქვეყანაში ბიტკოინის გადახდის საშუალებად გადაქცევის ექსპერიმენტმა არაერთგვაროვანი შედეგი აჩვენა.

გამომცემლობა TIME-თან ინტერვიუში ნაიბ ბუკელემ (Nayib Bukele) განაცხადა, რომ 2021 წლის 7 სექტემბერს სალვადორში ბიტკოინის ლეგალიზაციის შემდეგ ქვეყნის მაცხოვრებლები კრიპტოვალუტას თავშეკავებულად იყენებენ. ბუკელემ აღნიშნა, რომ სალვადორი იყო ერთ-ერთი პირველი ქვეყანა, რომელმაც აშშ დოლარზე დამოკიდებულების შესამცირებლად ბიტკოინი ალტერნატიულ ლეგიტიმურ ვალუტად მიიღო.

„ბიტკოინმა ვერ მიაღწია იმ ფართო გამოყენებას, რომლის იმედიც გვქონდა. თუმცა, მას ბევრი სალვადორელი იყენებს და ქვეყნის მსხვილი ბიზნესების უმეტესობა ფლობს. სალვადორში ბიტკოინის მიღების დადებითი ასპექტი ის არის, რომ ადამიანები მას ნებაყოფლობით იყენებენ – ჩვენ მისი მიღება არასდროს არავისთვის დაგვიძალებია. ჩვენ მათ ბიტკოინი, როგორც ალტერნატივა შევთავაზეთ.“ – თქვა ბუკელემ.

სალვადორის პრეზიდენტმა დასძინა, რომ თავის დროზე მთავრობამ 75 მილიონი დოლარი დახარჯა იმისთვის, რომ სახელმწიფო კრიპტო საფულე Chivo-ს მომხმარებლებისთვის ბიტკოინის სახით 30 დოლარი დაერიგებინათ.

ბუკელეს თქმით, მოქალაქეებმა, რომლებმაც ბიტკოინის გამოყენება გადაწყვიტეს, ღირსეული მოგება მიიღეს, რადგან კრიპტოვალუტამ ისტორიულ მწვერვალებზე დაბრუნება დაიწყო. ხოლო მათ, ვინც აირჩიეს ბიტკოინი არ გამოეყენებინათ, ვერანაირი სარგებელი ვერ ნახეს.

ბუკელეს სჯერა, რომ ბიტკოინის ლეგალიზებამ ქვეყანას უფრო მეტი დადებითი შედეგი მოუტანა, ვიდრე უარყოფითი და გამოვლენილი პრობლემები უმნიშვნელო იყო.

მისი თქმით, ბიტკოინის მიღების მცირე წარმატების მიუხედავად, მონეტამ უცხოური ინვესტიციები მოიზიდა, რამაც ქვეყანაში ტურიზმი ააღორძინა: კრიპტოვალუტის რამდენიმე კომპანიას სალვადორში უკვე აქვთ ოფისები ან სათაო ოფისები.

„არ ვაპირებ იმის თქმას, რომ ბიტკოინი მომავლის ვალუტაა, მაგრამ ამ კრიპტო აქტივს ნამდვილად დიდი მომავალი აქვს.“ – თქვა ბუკელემ.

საერთაშორისო სავალუტო ფონდის (IMF) კრიტიკის მიუხედავად, მიმდინარე წლის მარტში სალვადორის პრეზიდენტი მოსახლეობას დღეში თითო ბიტკოინის შეძენას დაჰპირდა. აგვისტოში საერთაშორისო სავალუტო ფონდმა ეკონომიკური რისკების თავიდან აცილების მიზნით სალვადორს ბიტკოინის გადახდის საშუალებად გამოყენების შეწყვეტა კიდევ ერთხელ ურჩია.