ბლოგერი კრიპტობირჟაზე კიმ ჩენ ინის სახელით დარეგისტრირდა

ბლოგერი კრიპტობირჟაზე კიმ ჩენ ინის სახელით დარეგისტრირდა

კრიპტო ბლოგერმა KYC (Know Your Client) პროცედურის შემოწმება კრიპტო ბირჟა Gate.io-ზე გადაწყვიტა და კიმ ჩენ ინის სახელით დარეგისტრირდა. მან ვერიფიკაცია სულ რამდენიმე წუთში გაიარა.

ბლოგერმა სახელად ZachXBT გადაწყვიტა შეემოწმებინა რამდენად კარგად მუშაობს ბირჟაზე KYC პროცედურები.

მან სულ რამდენიმე წუთში Gate.io-ზე ანგარიშის შექმნა და notlazarus-ის ელ.ფოსტის მეშვეობით ვერიფიკაციის გავლა კიმ ჩენ ინის სახელით წარმატებით შეძლო.

„როდესაც კრიპტო ბირჟაზე მოპარული ფული შემოდის, ადამიანებს მოსწონთ იმის ვარაუდი, რომ არსებობს რეალური ადამიანი, პიროვნება რომელსაც ანგარიში ეკუთვნის.“ – დაწერა მან ტვიტერზე.

მაგრამ, ბლოგერმა საპირისპიროს დამტკიცება შეძლო. მან კიდევ რამდენიმე ანგარიში ფიქტიური და ასევე აშშ-ს სანქციების სიაში მყოფი სახელებით დაარეგისტრირა. მისმა ყველა ანგარიშმა ვერიფიკაცია გაიარა და კრიპტოვალუტით ვაჭრობაზე წვდომა მიიღო.

ბლოგერის მიერ შექმნილი ელფოსტის სახელი (notlazarus) ჩრდილოეთ კორეასთან დაკავშირებული ჰაკერების ჯგუფზე, Lazarus Group-ზე  ერთგვარი მითითებაა.

თებერვლის დასაწყისში გაეროს მოხსენებაში აღნიშნული იყო, რომ 2022 წელს ჩრდილოეთ კორეელმა ჰაკერებმა  წინა წლებთან შედარებით რეკორდული მოცულობის კრიპტოაქტივების მოიპარვა შეძლეს.

აუდიტისა და კიბერუსაფრთხოების სფეროში მომუშავე კომპანია CertiK-ის თანახმად, აპრილში ჰაკერული თავდასხმების შედეგად კრიპტოპროექტებიდან 103 მილიონ დოლარზე მეტი იქნა მოპარული.