გენსლერის ბოდიში გაფუჭებულ საქმეს ვერ გამოასწორებს

გენსლერის ბოდიში გაფუჭებულ საქმეს ვერ გამოასწორებს

კრიპტოვალუტის ბირჟია Gemini-ს თანადამფუძნებელმა ტაილერ ვინკლვოსმა აშშ-ის ფასიანი ქაღალდებისა და ბირჟების კომისიის (SEC) თავმჯდომარეს გერი გენსლერს უწოდა სოციოპათი, რომელმაც კინაღამ კრიპტო ინდუსტრიის პარალიზება მოახდინა.

ვინკლვოსმა სოციალურ ქსელ X-ზე პოსტი გამოაქვეყნა, სადაც ის კომენტარს აკეთებს გერი გენსლერის ბოლო გამოსვლაზე, რომელშიც ოფიციალური პირი საკუთარი თავმჯდომარეობის პერიოდის საქმიანობას აჯამებს.

Gemini-ის თანადამფუძნებლის თქმით, გენსლერის ქმედება, რომლის ხელმძღვანელობითაც SEC-მა კრიპტო კომპანიების წინააღმდეგ მრავალი სარჩელი აღძრა, არ შეიძლება კანონის დაცვის სურვილით გამართლდეს.

ბევრმა კომპანიამ, მათ შორის Robinhood Crypto-მ, Uniswap Labs-მა, Consensys-მა და Crypto.com-მა მარეგულირებლებისგან გაფრთხილებები მიიღო, რომ მათ წინააღმდეგ მალე ფასიანი ქაღალდების შესახებ კანონების დარღვევისთვის საქმე აღიძვრება.

ვინკელვოსის აზრით, გენსლერის კრიპტოვალუტის საწინააღმდეგო პოზიცია „მისი პირადი და პოლიტიკური მიზნების მისაღწევად განზრახ შეიქმნა.“

„გენსლერის ვერანაირი ბოდიში ვერ ანაზღაურებს იმ ზიანს, რომელიც მან ჩვენს ინდუსტრიას და ჩვენს ქვეყანას მიაყენა. ასეთი ადამიანების ადგილი არც ერთ დაწესებულებაში არ არის. ნებისმიერი კომპანია, უნივერსიტეტი თუ ორგანიზაცია, რომელიც გენსლერთან SEC-ის შემდეგ იმუშავებს, კრიპტოინდუსტრიას უღალატებს.“- განაცხადა ვინკლოოსმა სოციალურ ქსელ X-ზე.

გენსლერის შესახებ, რომელმაც სარჩელი 80 მდე კრიპტო კომპანიის წინააღმდეგ შეიტანა, კრიტიკის შემცველი ტვიტი კომპანია Ripple-ის გენერალურმა მრჩეველმა სტიუარტ ალდეროტიმაც (Stuart Alderoty) გამოაქვეყნა.

„გერი გენსლერი ცდილობს კრიპტოვალუტების განადგურების მიზნით თავისი ოთხწლიანი პოლიტიკური ჯვაროსნული ლაშქრობა გაამართლოს. ის ამტკიცებს, რომ მხოლოდ ის საქმე გააგრძელა, რაც SEC-ის ყოფილმა ხელმძღვანელობამ დაიწყო. ეს იგივეა სახლი დაწვას და თქვას: „ჯერ ასანთი აანთეს, მე მხოლოდ ბენზინი დავამატე.“ – წერს ალდეროტი.

Blockchain Association-ისა და HarrisX-ის მიერ ჩატარებული ბოლო კვლევის თანახმად, გენსლერის ხელმძღვანელობის პერიოდში ამერიკულმა კრიპტო ინდუსტრიამ 400 მილიონ დოლარზე მეტი მარეგულირებელთან სამართლებრივ წარმოებაზე დახარჯა.