დააპატიმრეს Three Arrows Capital-ის თანადამფუძნებელი

დააპატიმრეს Three Arrows Capital-ის თანადამფუძნებელი

გაკოტრებული კრიპტოვალუტის ფონდ Three Arrows Capital-ის (TAC) თანადამფუძნებელი სუ ჟუ, სინგაპურში ქვეყნის დატოვების მცდელობისას დააკავეს.

საკონსულტაციო კომპანიაTeneo-ს განცხადებით, რომელიც Three Arrows Capital-ის ლიკვიდატორს წარმოადგენს, დაკავების ორდერის გაცემის შემდეგ პოლიციამ სუ ჟუ (Su Zhu) ჩანგის აეროპორტში მაშინ დააკავა, როდესაც ის სინგაპურის დატოვებას ცდილობდა. მისი დაკავების ორდერი მას შემდეგ გაიცა, რაც ჟუმ ვერ შეასრულა სასამართლოს დადგენილება, რომელიც მას Three Arrows Capital-ის გაკოტრებასთან დაკავშირებით ინმფორმაციის მიწოდებას ავალდებულებდა.

TAC-ის თანადამფუძნებელი პატიმრობაში ოთხ თვეს გაატარებს. ამ პერიოდის განმავლობაში TAC-ის კრედიტორებისთვის აქტივების დასაბრუნებლად მასთან ლიკვიდატორები ითანამშრომლებენ. ლიკვიდატორები აპირებენ გამოიყენონ ყველა შესაძლებლობა, რათა სასამართლოს დადგენილების შესრულება უზრუმველყონ და სუ ჟუ-სგან საჭირო დოკუმენტაცია სრულად მოიპოვონ. საჭიროების შემთხვევაში, ლიკვიდატორებს უფლება აქვთ სამართლებრივი ზომები საქმის წარმოების გასაგრძელებლად განახორციელონ.

10 მილიარდიანი ჰეჯ-ფონდიThree Arrows Capital 2022 წელს Terra-ს ეკოსისტემის ჩამოშლას ემსხვერპლა. TAC-ის დახურვის შემდეგ სუ ჟუ და მისი პარტნიორი კაილ დევისი (Kyle Davies) ლიკვიდატორებს ემალებოდნენ, თუმცა სოციალურ ქსელებში აქტიურობდნენ. Teneo-ს წარმომადგენლის თქმით, ანალოგიური დაკავების ორდერი დევისის სახელზეც გაიცა. დევისის ადგილსამყოფელი ამ დროისთვის უცნობია. სექტემბრის შუა რიცხვებში სინგაპურის სავალუტო ორგანომ (MAS) ჟუს და დევისს საინვესტიციო საქმიანობაში ჩართვა ცხრა წლის ვადით აუკრძალა, რადგან მათ ფასიანი ქაღალდებისა და ფიუჩერსების შესახებ კანონები დაარღვიეს.

ადრე Three Arrows Capital-ის დამფუძნებლები კრედიტორებს დაჰპირდნენ, რომ თანხების დასაბრუნებლად მათი ახალი კრიპტოვალუტის პლატფორმა Open Exchange-დან (OPNX) მიღებულ შემოსავალს გამოიყენებდნენ. თუმცა, უკვე აგვისტოში, დუბაის ვირტუალური აქტივების მარეგულირებელმა ორგანომ (VARA) ეს პლატფორმა 2,7 მილიონი დოლარით დააჯარიმა.