დემოკრატები FTX-სგან მიღებულ 1 მილიონს დააბრუნებენ

დემოკრატები FTX-სგან მიღებულ 1 მილიონს დააბრუნებენ

ამერიკის შეერთებული შტატების დემოკრატიულ პარტიაში შემავალი სამი ორგანიზაცია გაკოტრებული ბირჟა FTX-ისგან მიღებული შემოწირულობის დაბრუნებას გეგმავს.  1 მილიონ დოლარზე მეტი დაზარალებულებს მოხმარდება.

ბირჟის გაკოტრების შედეგად დაზარალებულებისთვის თანხის დაბრუნების შესახებ განცხადება სამმა დემოკრატიულმა კომიტეტმა : Democratic National Committee (DNC), Democratic Senatorial Campaign Committee (DSCC) და Democratic Congressional Campaign Committee (DCCC) გააკეთა.

„FTX-ის დამფუძნებლის, სემ ბენკმენ-ფრიდის (Sam Bankman-Fried) მიერ კამპანიის დაფინანსების დროს პოტენციურ დარღვევებში ბრალდებების გათვალისწინებით, ჩვენ  2020 წლიდან მიღებული შემოწირულობების ასანაზღაურებლად 815,000 აშშ დოლარს გამოვყოფთ. როგორც კი სამოქმედო გეგმა შეთანხმებული იქნება, თანხას ოპერატიულად დავაბრუნებთ“ – განაცხადა DNC-ის წარმომადგენელმა.

ორგანიზაცია DSCC 103,000 დოლარს ხოლო DCCC 250,000 დოლარს დააბრუნებს.

თავად FTX-ის დამფუძნებლის განცხადებით, მან სხვადასხვა დემოკრატიულ ორგანიზაციას დაახლოებით 40 მილიონი დოლარი შესწირა.

ცოტახნის წინ კი განაცხადა, რომ თანხებს ფარულად რესპუბლიკლებსაც ურიცხავდა.

როგორც ირკვევა, თეთრმა სახლმა ბენკმენ-ფრიდისგან დაახლოებით 5.2 მილიონი დოლარი მიიღო. ოფიციალური პირები ამ თანხების განკარგვასთან დაკავშირებით შეკითხვებზე პასუხს თავს არიდებენ და კითხვებზე პასუხის გასაცემად  DNC-ის წარმომადგენლებთან ამისამართებენ.