დოლარი სტატუსს ბიტკოინს დაუთმობს

დოლარი სტატუსს ბიტკოინს დაუთმობს

საინვესტიციო კომპანია BlackRock-ის აღმასრულებელმა დირექტორმა ლარი ფინკმა ინვესტორებისადმი ყოველწლიურ მიმართვაში განაცხადა, რომ აშშ დოლარმა შესაძლოა მსოფლიო სარეზერვო ვალუტის სტატუსი დაკარგოს და რომ ამ როლს ბიტკოინი მოირგებს.

ლარი ფინკმა (Larry Fink) ხაზგასმით აღნიშნა, რომ გასულ წელს აშშ-ს მთავრობამ სახელმწიფო ვალის დასაფარად 952 მილიარდ დოლარზე მეტი დახარჯა. ფინკის თქმით, თუ სიტუაცია არ შეიცვალა, 2030 წლისთვის სახელმწიფო გადახდები და საპროცენტო ხარჯები ბიუჯეტის შემოსავლებს გადააჭარბებს, რაც მუდმივ დეფიციტს გამოიწვევს.

„თუ შეერთებული შტატები თავის დავალიანებას ვერ გააკონტროლებს, დეფიციტი ზრდას განაგრძობს. შეიქმნება საფრთხე იმისა, რომ ამერიკამ პოზიციები ბიტკოინის მსგავს ციფრულ აქტივებს დაუთმოს.“

ფინკმა ხაზი გაუსვა იმ გარემოებასაც, რომ გარკვეული რისკების მიუხედავად, დეცენტრალიზებული ფინანსური სისტემები ბაზრების სიჩქარეს, გამჭვირვალობას და ხელმისაწვდომობას უზრუნველყოფს.

BlackRock-ის ხელმძღვანელი აქტივების ტოკენიზაციის პერსპექტივებსაც შეეხო და ეს ტექნოლოგია ქაღალდის წერილებიდან ელექტრონულ ფოსტაზე გადასვლას შეადარა. ტოკენიზაცია აქციების, ობლიგაციებისა და უძრავ ქონების გაციფრულების შესაძლებლობას იძლევა, რაც ინვესტიციებს უფრო ხელმისაწვდომს, ხოლო ტრანზაქციებს უფრო სწრაფს ხდის.

მისი თქმით, ტექნოლოგია აქტივების ფლობას ამარტივებს და ზრდის მაღალშემოსავლიან ინვესტიციებზე წვდომას. ამას ფინანსურ ბაზრებზე რევოლუციის მოხდენა და ახალი ინვესტორების მოზიდვა შეუძლია.

მანამდე ლარი ფინკმა განაცხადა, რომ თუ ყველა კატეგორიის ინვესტორი თავისი პორტფელის 2-დან 5%-მდე ინვესტირებას პირველ კრიპტოვალუტაში განახორციელებს, ბიტკოინის კურსმა შესაძლოა 700 000 დოლარს მიაღწიოს.