ევროკავშირის 12 ქვეყანას კრიპტო რეგულაციების შეუსრულებლობის გამო სასამართლო ემუქრებათ
by Giorgi 
ევროკავშირის 12 ქვეყანას კრიპტო რეგულაციების შეუსრულებლობის გამო სასამართლო ემუქრებათ
ევროკომისიამ იმ წევრ სახელმწიფოებს, რომლებსაც კრიპტოვალუტით ტრანზაქციების შესახებ საგადასახადო ორგანოებთან ანგარიშგების ახალი საერთო წესები ჯერ კიდევ არ დაუნერგავთ, გაფრთხილება გაუგზავნა.
წერილობითი გაფრთხილებები 12 ქვეყანას: ბელგიას, ბულგარეთს, ჩეხეთს, ესტონეთს, საბერძნეთს, ესპანეთს, კვიპროსს, ლუქსემბურგს, მალტას, ნიდერლანდებს, პოლონეთსა და პორტუგალიას გაეგზავნათ.
ევროკომისის მტკიცებით, ჩამოთვლილი ქვეყნები კრიპტოაქტივების ტრანზაქციების საგადასახადო გამჭვირვალობის წესებს არ იცავენ. შეტყობინებებში ნათქვამია, რომ ამ ქვეყნებმა არ მიიღეს ან მხოლოდ ნაწილობრივ მიიღეს კანონები, რომლებიც მომსახურების მიმწოდებლებს, მათ შორის ბირჟებსა და სადეპოზიტო სერვისებს, ეროვნული საგადასახადო ორგანოებისთვის მომხმარებლებისა და ტრანზაქციების მონაცემების გაზიარებას ავალდებულებს. გარდა ამისა, თორმეტივე ქვეყანას ევროკავშირის სხვა ქვეყნების საგადასახადო ორგანოებთან თანამშრომლობის ვალდებულება აქვთ.
უნგრეთს, ეროვნულ კანონმდებლობაში კრიპტოაქტივების გაცვლის ვალიდაციის შესახებ ცვლილებების შეტანასთან დაკავშირებით ცალკე შეტყობინება გაეგზავნა. ევროკომისიის ცნობით, ამ ცვლილებებმა ზოგიერთი სერვისის მიმწოდებელი აიძულა, ქვეყანაში საქმიანობა შეეჩერებინა ან მთლიანად შეეწყვიტა. უნგრეთის ხელისუფლების განცხადებით, მიღებული ცვლილებები ფულის გათეთრებისა და ტერორიზმის დაფინანსების წინააღმდეგ ბრძოლას აძლიერებს. თუმცა, ევროკომისიის მტკიცებით, ნებისმიერი ეროვნული რეგულაცია და ცვლილება ევროკავშირის მიერ დამტკიცებული MiCA-ს დებულებებს მკაცრად უნდა შეესაბამებოდეს.
„ევროკომისიის შეტყობინება ევროკავშირის კანონმდებლობის შეუსრულებლობისთვის პასუხისმგებლობის დაკისრების პროცედურის საწყის ეტაპს წარმოადგენს. ხარვეზების გამოსასწორებლად 12 სახელმწიფოს ორი თვის ვადა აქვთ. თუ მოცემულ ვადაში მოთხოვნები არ დაკმაყოფილდა, საქმე შესაძლოა ევროკავშირის სასამართლომდე მივიდეს.“
MiCA 2023 წელს იქნა დამტკიცებული. მიღებული რეგულაციების თანახმად, კომპანიები, რომლებიც 2024 წლის დეკემბრამდე ოპერირებდნენ, ვალდებულნი არიან სრულად დაიცვან MiCA-ს ყველა მოთხოვნა ან 1 ივლისის ჩათვლით მომსახურების გაწევა შეწყვიტონ.
წელს მსოფლიოს 48 ქვეყნის კრიპტოვალუტის სერვისები ვალდებულნი არიან კრიპტოვალუტით ტრანზაქციების შესახებ ინფორმაციის შეგროვება დაიწყონ. ეკონომიკური თანამშრომლობისა და განვითარების ორგანიზაციის (OECD) წევრი სახელმწიფოები საგადასახადო შემოსავლების გაზრდისა და საერთაშორისო საგადასახადო სტანდარტების დაცვის მიზნით ამ მონაცემების გაზიარებას აპირებენ.
წყარო: https://ec.europa.eu/commission/presscorner/detail/en/inf_26_115
სიახლეების გამოწერა
