ევროკავშირი არალიცენზირებულ კრიპტო კომპანიებს გააძევებს

ევროკავშირი არალიცენზირებულ კრიპტო კომპანიებს გააძევებს

ევროკავშირმა შესაძლოა  არალიცენზირებულ კრიპტო კომპანიებს ევროპის დატოვება აიძულოს.

ევროკავშირის კანონმდებლებმა  ფულის გათეთრების საწინააღმდეგო კანონპროექტში (AML) დაამატეს დებულებები, რომლებიც კრიპტოვალუტის სერვისების არარეგისტრირებულ პროვაიდერებს ევროპის დატოვებას აიძულებს.

CoinDesk-ის ცნობით, 31 მარტს ევროკავშირის დეპუტატებმა საპარლამენტო კომიტეტის კენჭისყრაზე უნდა წარადგინონ კანონპროექტი, რომელიც მიზნად  ევროპაში  კრიპტოვალუტის ანონიმური ტრანზაქციების შეჩერებას ისახავს.

 ახალი რეგულაციების თანახმად, ფინანსურ ინსტიტუტებს, ისევე როგორც ევროკავშირში რეგულირებულ კრიპტო კომპანიებს, „კანონთან შეუსაბამო კრიპტო კომპანიებთან“ ნებისმიერი სახის ბიზნეს საქმიანობა აეკრძალებათ.

ტექსტში „კრიპტო აქტივების სერვისის შეუსაბამო პროვაიდერი“ განისაზღვრება, როგორც კომპანია „რომელიც არ არის რეგისტრირებული ან არ აქვს სათაო ოფისი ან წარმომადგენლობა რომელიმე იურისდიქციაში,  არ არის დაკავშირებული რომელიმე რეგულირებად ერთეულთან ან ევროკავშირში ნებართვის გარეშე მოქმედებს“.

ნაგულისხმებია, რომ კრიპტო კომპანიები, რომელთაც ევროკავშირში მომხმარებლებისთვის სერვისების შეთავაზება სურთ, უნდა იყვნენ რეგისტრირებული როგორც ბიზნესი,

ასევე უნდა ჰქონდეთ ლიცენზია ან მარეგულირებლის ნებართვა ნებისმიერ იურისდიქციაში.

CoinDesk-ის წყაროს ცნობით, შემოთავაზებული კანონმდებლობა  ევროკავშირში მოქმედი კრიპტო სერვისის პროვაიდერების ფინანსური სისტემიდან მოწყვეტას ისახავს მიზნად.  მანამ, სანამ ამ კომპანიების სათანადოდ რეგულირება არ მოხდება.

CoinDesk-ის სხვა წყაროს განცხადებით კი პრობლემები შეექმნებათ კომპანიებს, როგორიცაა Binance, რომელმაც რამდენიმე იურისდიქციის მარეგულირებლებისგან გაფრთხილებები  მიიღო.

Binance-ს, რომელიც კაიმანის კუნძულებზეა რეგისტრირებული, ამჟამად სათაო ოფისი არ აქვს. თუმცა, კომპანიამ კრიპტოვალუტის სერვისების გაწევისთვის ლიცენზია ახლახან  ბაჰრეინსა და დუბაიში მიიღო.

ევროკავშირი კრიპტოვალუტის კომპანიებისთვის სულ უფრო მეტ შეზღუდვებს აწესებს, რამაც შესაძლოა ევროკავშირიდან  ციფრულ აქტივებში ინვესტიციების გადინება გამოიწვიოს.

მაგალითად, ევროპარლამენტი AML-ის პროცედურების გაფართოებას  კრიპტოვალუტის ყველა ტრანზაქციაზე გეგმავს.

ასევე იგეგმება ევროკავშირიდან კრიპტო ტრანსფერების შეზღუდვა ან აკრძალვა საგადასახადო თავშესაფრად მიჩნეულ ადგილებში.

გასულ კვირას, Coinbase Exchange-ის პოლიტიკის დირექტორმა ფარიარ შირზადმა (Faryar Shirzad), კრიპტო-საზოგადოებას მოუწოდა ევროკავშირის მიერ საერთაშორისო ტრანზაქციების შესახებ დაგეგმილი ცვლილებების წინააღმდეგ გამოვიდნენ.