ენერგო კრიზისის ფონზე მოლდოვამ მაინინგი აკრძალა

 ენერგო კრიზისის ფონზე მოლდოვამ მაინინგი აკრძალა

მოლდოვის ხელისუფლებამ ქვეყანაში კრიპტოვალუტის მაინინგის სრულად აკრძალვა გადაწყვიტა – შესაბამისი გადაწყვეტილება საგანგებო სიტუაციების კომისიის სხდომაზე მიიღეს.

მაინინგის აკრძალვა ენერგეტიკულ კრიზისს და ზამთრის მოახლოებას უკავშირდება.

მოლდოვის პრეზიდენტმა მაია სანდუმ (Maia Sandu) უშიშროების საბჭოს სხდომაზე მთავრობას ელექტროენერგიის დაზოგვის ზომების შემუშავებისკენ მოუწოდა. ერთ-ერთი პირველი „სამიზნე“ კრიპტოვალუტის მაინინგ ინდუსტრია აღმოჩნდა.

„იკრძალება კრიპტო აქტივებთან დაკავშირებული საქმიანობა, ასევე მიუხედავად იმპორტიორი კომპანიის ადგილმდებარეობისა,  HS 8471 50,000 სატარიფო პოზიციით კლასიფიცირებული სპეციალიზებული აღჭურვილობის იმპორტი.“ – ნათქვამია კომისიის სხდომის დასკვნით ოქმში.

მაინინგის აკრძალვის გარდა, მოლდოვის ხელისუფლებამ ელექტროენერგიის მოხმარების შემცირების, ლიფტების ნაკლები სიხშირით გამოყენების, კომერციული უძრავი ქონების განათების შემცირების და სხვა რეკომენდაციები გასცა.

გარდა ამისა, ხელისუფლების გადაწყვეტილებით  კიშინიოვში ქუჩის განათებას ერთი საათით გვიან ჩართავენ და ერთი საათით ადრე გამორთავენ.  

უნდა აღინიშნოს, რომ მოლდოვაში მაინინგის ინდუსტრია ენერგიის მნიშვნელოვან  მომხმარებელს არ წარმოადგენს.

თუმცა, ჯერ კიდევ 2018 წელს იტალიელი ინვესტორების მიერ მოლდოვაში უმსხვილესი მაინინგ ფერმის მშენებლობაში დიდი ინვესტიციის ჩადება მოხდა.