ესპანელი ჩრდილოეთ კორეელებისთვის კონფერენციის გამართვისთვის დააკავეს

ესპანელი ჩრდილოეთ კორეელებისთვის კონფერენციის გამართვისთვის დააკავეს

ესპანეთის მოქალაქე სამშობლოში ჩრდილოეთ კორეის სახალხო რესპუბლიკაში ბლოკჩეინისა და კრიპტოვალუტების შესახებ კონფერენციის ორგანიზებისთვის დააკავეს.

სამართალდამცავების აზრით, ეს ღონისძიება შესაძლოა ჩრდილოეთ კორეას სანქციების გვერდის ავლაში დაეხმაროს.

ალეხანდრო კაო დე ბენოსი (Alejandro Cao de Benos) მადრიდის პუერტა დე ატოჩას მატარებლის სადგურზე დააკავეს. აშშ-ის იუსტიციის დეპარტამენტის მტკიცებით, 2019 წლის აპრილში დე ბენოსმა ჩრდილოეთ კორეის ოფიციალურ პირებს აუხსნა, თუ როგორ შეეძლო სახელმწიფოს ფულის გათეთრებისა და საერთაშორისო სანქციების თავიდან აცილებისთვის უახლესი ტექნოლოგიების გამოყენება.

დაკავებამდე ერთ წელზე მეტი ხნის განმავლობაში დე ბენოსი გამოძიების ფედერალური ბიუროს (FBI) ყველაზე ძებნილი კრიმინალების სიაში იყო და ყალბი სახელით ბარსელონაში იმალებოდა.

ჩრდილოეთ კორეის რეჟიმის მხარდამჭერმა ბენოსმა 2000 წელს ორგანიზაცია Korea Friendship Association – კორეასთან მეგობრობის ასოციაცია დააარსა.

აშშ-ს იუსტიციის დეპარტამენტი ირწმუნება, რომ ესპანელმა ჩრდილოეთ კორეაში ბლოკჩეინის შესახებ კონფერენციის დაგეგმვა ჯერ კიდევ 2018 წელს დაიწყო.

კონფერენციის მონაწილეებს შორის იყო Ethereum-ის ყოფილი დეველოპერი ვირჯილ გრიფიტი (Virgil Griffith), რომელიც ღონისძიებაში მონაწილეობისთვის ასევე დააკავეს. ჯერ კიდევ 2022 წელს სასამართლომ გრიფიტს ხუთი წლით თავისუფლების აღკვეთა მიუსაჯა და 100 000 დოლარის ოდენობის ჯარიმა დააკისრა.

პარასკევს, 1 დეკემბერს ბენოსი ესპანეთის უმაღლესი სასამართლოს წინაშე წარდგა. მან ამერიკელი პროკურორების ბრალდებები უარყო და მათ სიცრუე უწოდა.

ესპანელს აშშ-ს ციხეში 20 წლამდე პატიმრობა ემუქრება, თუმცა ამერიკულ მხარეს ექსტრადიციის პროცესი ჯერ არ დაუწყია.

მაისში აშშ-ს მთავრობამ განაცხადა, რომ კიბერთავდასხმები და კრიპტოვალუტების ქურდობა იარაღის პროგრამების დასაფინანსებლად ჩრდილოეთ კორეის ხელისუფლების შემოსავლის მთავარ წყაროდ გადაიქცა.