ვინც კურსის ვარდნისას ბიტკოინი გაყიდა ხელმოცარულია

ვინც კურსის ვარდნისას ბიტკოინი გაყიდა ხელმოცარულია

„მდიდარი მამა, ღარიბი მამა“ პერსონალური ფინანსების შესახებ წიგნის ავტორი რობერტ კიოსაკი (Robert Kiyosaki) იმ ინვესტორებს, რომლებმაც კრიპტო ბაზრის ბოლოდროინდელი ვარდნის დროს თავიანთი ბიტკოინები გაყიდეს ხელმოცარულები უწოდა.

კიოსაკი დარწმუნებულია, რომ მომავალში ეს ადამიანები მიღებულ გადაწყვეტილებას ინანებენ. მისი აზრით, კრიპტო ბაზარზე დაღმავალი ტრენდის დროს ბიტკოინის გაყიდვა დიდი შეცდომაა. გამოცდილი ინვესტორის თქმით, პირველი კრიპტოვალუტის ზრდა გარდაუვალია და ამას ხელს მრავალი ფაქტორი შეუწყობს. ამერიკელმა მწერალმა აშშ-ს პრეზიდენტ ტრამპის კრიპტოვალუტების მიმართ კეთილგანწყობა აღნიშნა და მას უწოდა „პოლიტიკური ლიდერი, რომელსაც ბიტკოინის პოტენციალი ესმის.“

„პრეზიდენტი ტრამპი – ეს არის საჭირო პრეზიდენტი საჭირო დროს. მას ესმის ბიტკოინის ძალა. როდესაც ის ბიტკოინის ყიდვას ამერიკის ფინანსური სიგიჟის მოსაგვარებლად დაიწყებს, ის ვინც კრახის დროს ბიტკოინი იყიდა, გამარჯვებული იქნება… ხოლო ვინც გაყიდა, დამარცხებული. მე მეტი ბიტკოინი ვიყიდე და შენ? – ჰკითხა რობერტ კიოსაკიმ თავის გამომწერებს სოციალურ პლატფორმა X-ზე.

თებერვლის ბოლოს ბიტკოინის კურსი 90 000 დოლარიდან 80 000 დოლარამდე დაეცა. თუმცა, 2 მარტს ბიტკოინი სწრაფად აღდგა და 95,050 დოლარამდე გაიზარდა. ზრდას უკავშირებენ ტრამპის განცხადებას სტრატეგიული რეზერვის შექმნის შესახებ, რომელიც ბიტკოინს და რამდენიმე სხვა ალტკოინს მოიცავს, რამაც ინვესტორების კეთილგანწყობა გამოიწვია. თუმცა, სიხარული ხანმოკლე აღმოჩნდა – ბიტკოინის კურსი კვლავ დაეცა და ახლა მონეტა 88 000 დოლარად იყიდება.

ცოტა ხნის წინ კიოსაკიმ საკუთარი მოსაზრებით ბიტკოინის კურსის ვარდნის მიზეზები დაასახელა. მისი აზრით, ესაა მსოფლიოში ფინანსური არასტაბილურობა და „კრიმინალი ბანკირები“.

მანამდე ინვესტორმა აშშ-ს პრეზიდენტის მიერ გამოშვებული მემკოინი TRUMP გააკრიტიკა. კიოსაკის თქმით, პოლიტიკური მემკოინების გამოჩენამ კრიპტოვალუტის ბაზრის თავდაპირველი ჩანაფიქრიდან გადახვევა გამოიწვია.