იაპონია ციფრული აქტივების ახალ კლასიფიკაციას გვთავაზობს

იაპონია ციფრული აქტივების ახალ კლასიფიკაციას გვთავაზობს

იაპონიის ფინანსური მომსახურების სააგენტომ (FSA) გამოაქვეყნა სადისკუსიო დოკუმენტი, რომელშიც ციფრული აქტივების ორ კატეგორიად: კომერციულ და არაკომერციულ აქტივებად დაყოფას გვთავაზობს.

ანგარიშში სახელწოდებით „კრიპტოვალუტასთან დაკავშირებული სისტემების სტრუქტურის შესწავლა“, იაპონიის ფინანსური მარეგულირებელი კრიპტოაქტივების ორ ძირითად კატეგორიად დაყოფის შეთავაზებას აჟღერებს. ესენია : 1 – კომერციული ან საინვესტიციო ტოკენები, რომლებიც თანხების მოსაზიდად გამოიცემა და 2 – არაკომერციული ტოკენები, როგორიცაა ბიტკოინი და ეთერიუმი. მარეგულირებლის განცხადებით, ამგვარი კლასიფიკაცია ბაზარზე არსებულ ინფორმაციულ ასიმეტრიას აღმოფხვრის.

„პირველი ტიპის კრიპტოაქტივები ინვესტორებისთვის დამატებით გარანტიებსა და გამჭვირვალობას მოითხოვს, ხოლო მეორე ტიპის კრიპტოაქტივების შემთხვევაში, ბაზარზე მათი სტაბილურობის მონიტორინგზე ფოკუსირება რეგულირებადი ბირჟების მეშვეობით შეგვიძლია. “- განაცხადა სააგენტომ.

მაგალითად, პირველი ტიპის აქტივებისთვის ფინანსური მომსახურების სააგენტო (FSA) ემიტენტებისგან თანხების გამოყენების მიზნობრიობის, ბიზნესის წარმოების წესებისა და ბაზრის მანიპულაციების საწინააღმდეგო ზომების შესახებ დეტალური ინფორმაციის მიწოდებას მოითხოვს. მე-2 ტიპის აქტივების შემთხვევაში კი, რომლებსაც უმეტესად ემიტენტები არ ჰყავთ, კონტროლი კრიპტო ბირჟების მეშვეობით განხორციელდება, რომლებიც ფასების ცვლილებას თვალყურს ადევნებენ.

რეგულირების განხორციელება ფინანსური ინსტრუმენტებისა და ბირჟების შესახებ კანონზე (FIEA) დაყრდნობით იგეგმება, რაც თაღლითობისა და ინსაიდერული ვაჭრობის წინააღმდეგ საბრძოლველად უკვე არსებული მექანიზმების გამოყენების შესაძლებლობას იძლევა.

სააგენტოს წინადადების საზოგადოებრივი განხილვა 10 მაისამდე გაგრძელდება. ამის შემდეგ FSA საზოგადოებრივი აზრისა და რეგულირების საერთაშორისო ტენდენციების გათვალისწინებით, კანონმდებლობის დახვეწას გეგმავს.