by Giorgi 
ინვესტორებმა Uniswap-ის თაღლითობაში თანამონაწილეობის დამტკიცება ვერ შეძლეს
მანჰეტენის ფედერალურმა სასამართლომ დეცენტრალიზებული კრიპტო ბირჟა Uniswap-ის წინააღმდეგ არსებული თაღლითურად შექმნილი ტოკენებით ვაჭრობასთან დაკავშირებული კოლექტიური სარჩელი არ დააკმაყოფილა. მოსამართლე კეტრინ პოლკ ფაილას (Katherine Polk Failla) დადგენილებით, მოსარჩელეებს პლატფორმის წინააღმდეგ მსგავსი სარჩელის შეტანა აეკრძალათ.
სასამართლომ დაადგინა, რომ Uniswap მისი პლატფორმით მოსარგებლე ტოკენების უცნობი ემიტენტების უკანონო ქმედებებზე ვერ იქნება პასუხისმგებელი. გადაწყვეტილების თანახმად, მოსარჩელეებმა ვერ შეძლეს დამაჯერებლად დაემტკიცებინათ, რომ Uniswap-ის თანამშრომლებმა თაღლითობის შესახებ იცოდნენ და დამნაშავეებს ეხმარებოდნენ. სასამართლოს დადგენილებით, კრიპტო ბირჟა მომხმარებლებს სტანდარტულ, იურიდიულად გამართულ მომსახურებას სთავაზობდა და არ შეიძლება პლატფორმის თაღლითურ გამოყენებაზე პასუხი მოეთხოვოს.
„შექმნა პლატფორმა, რომელზეც შესაძლოა თაღლითობა მოხდეს, დანაშაულის აქტიურ ხელშეწყობას არ ნიშნავს. ეს არგუმენტი დაუსაბუთებელია იმავე მიზეზის გამო, რა მიზეზითაც ბანკი ვერ ჩაითვლება ფულის გათეთრების თანამონაწილედ, თუკი ბოროტმოქმედი მის ანგარიშებს იყენებს .“ – ნათქვამია გადაწყვეტილებაში.
ეს Uniswap-ის წინააღმდეგ სარჩელის შეტანის მეორე მცდელობაა. იგივე მოსარჩელეების განცხადებით, პლატფორმაზე დაშვებული იყო „rug pulls“ და „pump-and-dump“ ტიპის სქემები.
სასამართლო დავა ოთხ წელს გრძელდებოდა. მოსარჩელეებმა Uniswap-ს პირველად 2022 წლის აპრილში უჩივლეს, ისევე როგორც ვენჩურული კაპიტალის კომპანიებს: Paradigm, Andreessen Horowitz და Union Square Ventures-ს. მაშინ ინვესტორებმა მოპასუხეები ფასიანი ქაღალდების შესახებ კანონმდებლობის დარღვევაში დაადანაშაულეს. სარჩელი 2023 წლის აგვისტოში გაუქმდა, გადაწყვეტილება კი მოგვიანებით სააპელაციო სასამართლოში გაასაჩივრეს.
სიახლეების გამოწერა
