ინსტიტუციური ინვესტორების პორტფელებში Solana-ს წილი გაიზარდა
აქტივების მართვის კომპანია CoinShares-ის მონაცემებით, ინსტიტუციურმა ინვესტორებმა საგრძნობლად გაზარდეს ინვესტიციები ალტკოინებში, რომელთაგან ერთ-ერთი Solana-ა.
CoinShares-ის ანალიტიკოსებმა ინსტიტუციურ ინვესტორებს შორის გამოკითხვა ჩაატარეს. გამოკითხვაში მონაწილეობა სულ 64-მა კომპანიამ მიიღო, რომელთა აქტივების ჯამური რაოდენობა 600 მილიარდ დოლარს შეადგენს. რესპონდენტთა 15%-ის განცხადებით, ისინი ინვესტიციებს Solana-ზე დაფუძნებულ პროდუქტებში ახორციელებდნენ.
„ინვესტორები Solana-თან მიმართებაში ძალიან ოპტიმისტურად არიან განწყობილი.“ – განაცხადა CoinShares-ის კვლევის ხელმძღვანელმა ჯეიმს ბატერფილმა (James Butterfill).
კომპანია Ripple-ის მონეტა XRP-ის მიმართ ინტერესი კი პირიქით, საგრძნობლად შემცირდა და ამჟამად ეს კრიპტოვალუტა არც ერთი გამოკითხული ინვესტორის პორტფელში არ აღმოჩნდა. თუმცა, XRP-ზე დაფუძნებულ პროდუქტებს გარკვეული პოპულარობა მაინც აქვთ – გასულ კვირას ასეთმა ფონდებმა 1,3 მილიონი დოლარი მოიზიდა.
კვლევაში ასევე აღნიშნულია, რომ ინსტიტუციურმა ინვესტორებმა თავიანთ პორტფელებში კრიპტოვალუტის ინვესტიციების წილი 3%-მდე გაზარდეს. იანვარში ეს მაჩვენებელი მხოლოდ 1.3%-ს შეადგენდა.
ბატერფილმა ხაზგასმით აღნიშნა, რომ ეს პირველ რიგში შეერთებულ შტატებში ბიტკოინის გაცვლითი სავაჭრო ფონდების (ETF-ების ) გამოჩენამ გამოიწვია. ინსტიტუციური ინვესტორების ძირითად აქტივებს კვლავაც აქციები შეადგენენ. მათ ინსტიტუციური პორტფელების 55% უკავიათ.
კრიპტოვალუტებში ინვესტირების მთავარ დაბრკოლებად რესპონდენტები მარეგულირებლების მხრიდან მაღალ რისკებს, ასევე შიდა კორპორატიულ შეზღუდვებს ასახელებენ. ის კომპანიებიც კი, რომლებიც ინვესტირებას ციფრულ აქტივებში ახდენენ, კრიპტოვალუტის სექტორის მთავარ რისკებად რეგულირებას და პოლიტიკურ ვითარებას ასახელებენ.
- გამოგვეყვით ტელეგრამზე t.me/cryptonewsgeorgia
- დაემატეთ ჩვენს ჯგუფში Fb.me/groups/cryptonewsgeorgia
Comments (No)