კალიფორნიაში შემოწირულობების კრიპტოში მიღება დაუშვეს

კალიფორნიაში შემოწირულობების კრიპტოში მიღება დაუშვეს

კალიფორნიის ხელისუფლებამ პოლიტიკოსებს ნება დართო, შემოწირულობები კრიპტოვალუტაში მიიღონ.

კალიფორნიის შტატის სამართლიანი პოლიტიკური პრაქტიკის კომისიამ (FPPC) კრიპტოვალუტებში შემოწირულობების მიღების ოთხწლიანი აკრძალვის მოხსნას მხარი ერთხმად დაუჭირა.

კომისიის განახლებული რეგლამენტის  მიხედვით, კრიპტოაქტივებში შემოწირულობები შუამავალი გადახდების ოპერატორის მეშვეობით უნდა განხორციელდეს, რომელიც ამერიკული ფინანსური დანაშაულის აღსრულების ქსელში (FinCEN) უნდა იყოს რეგისტრირებული, მისი სათაო ოფისი კი შეერთებულ შტატებში უნდა მდებარეობდეს. 

ოპერატორმა  სპონსორების ვინაობის დასადასტურებლად KYC  პროცედურა უნდა შეასრულოს. კრიპტოვალუტაში შემოწირულობები დაუყოვნებლივ უნდა კონვერტირდეს აშშ დოლარში და ორი დღის განმავლობაში მიმღების საბანკო ანგარიშზე გადაირიცხოს. ახალი რეგულაცია ძალაში 60 დღეში შევა.

„კრიპტოვალუტა ახალი და მუდმივად ცვალებადი ინდუსტრიაა. მისი განვითარების ფეხდაფეხ ჩვენ რეგლამენტის კორექტირება გვჭირდება.

დარწმუნებული ვარ, რომ მოცემულ მომენტში, ის კრიპტოვალუტებში შემოწირულობებს სათანადოდ არეგულირებს, და შესაძლო კანონდარღვევებს აფერხებს“, – თქვა FPPC-ის იურიდიული დეპარტამენტის გენერალურმა მრჩეველმა დევიდ ბეინბრიჯმა (David Bainbridge).

კომისიამ კრიპტო აქტივების წარმომავლობის დადგენის შესაძლო გართულების თავიდან აცილების მიზნით კრიპტოდონაციები 2018 წელს აკრძალა.

კალიფორნია არ იყო აშშ-ს ერთადერთი შტატი, რომელმაც პოლიტიკური კამპანიების დასაფინანსებლად ციფრული აქტივების გამოყენება აკრძალა.

2018 წელს  მსგავსი აკრძალვა მიჩიგანის შტატმაც გაატარა, მიუხედავად იმისა, რომ ბევრმა შტატმა, მათ შორის კოლორადომაც, შემოწირულობების ბიტკოინებში შეგროვება დააკანონა.

მარტში, ანალოგიური კანონპროექტი ლუიზიანას კანონმდებლებმაც წარმოადგინეს.

კანონპროექტი ოფიციალურ პირებსა და პოლიტიკურ პარტიებს კრიპტოვალუტების მიღებასა და შემდეგ მათ ფიატურ ფულზე გაცვლის საშუალებას აძლევს.