კონგრესმენი ტომ ემერი ციფრული დოლარის აკრძალვას მოითხოვს

კონგრესმენი ტომ ემერი ციფრული დოლარის აკრძალვას მოითხოვს

აშშ-ს კონგრესის რესპუბლიკური პარტიის წევრის განცხადებით, ციფრული დოლარის ამოქმედებამ შესაძლოა ამერიკელების კონფიდენციალურობასა და თავისუფლებას საფრთხე შეუქმნას.

წარმომადგენელთა პალატაში გამოსვლის დროს ტომ ემერმა (Tom Emmer) ცენტრალური ბანკის ციფრული ვალუტის (CBDC) ამოქმედება გააპროტესტა.

კონგრესმენის თქმით, ციფრული დოლარის დახმარებით ფედერალურ ხელისუფლებას მოქალაქეთა ფინანსური ტრანზაქციების შესახებ ინფორმაციაზე წვდომის შესაძლებლობა მიეცემა.

ემერმა CBDC-ს  „სათვალთვალო ინსტრუმენტი“უწოდა, რომლის მეშვეობითაც ოფიციალური პირები კონფიდენციალურობის დარღვევით კერძო გადახდების გაკონტროლებას შეძლებენ.

„განსხვავებით დეცენტრალიზებული ციფრული აქტივებისგან, როგორიცაა ბიტკოინი, CBDC არის სუვერენული ვალუტის ციფრული ფორმა, რომელიც შემუშავებულია, გამოშვებულია და კონტროლდება ფედერალური მთავრობის მიერ. გულუბრყვილოა იფიქრო, რომ მთავრობა იარაღად არ გამოიყენებს კონტროლის ინსტრუმენტებს, თუ ისინი უკვე მის განკარგულებაშია. შესაძლოა სწორედ ამიტომ გამოსცა ბაიდენის ადმინისტრაციამ აღმასრულებელი ბრძანება, რომელშიც CBDC-სთან დაკავშირებული კვლევისა და განვითარების აქტუალურობაა ხაზგასმული.“- განაცხადა რესპუბლიკელმა კანონმდებელმა.

კონგრესმენმა მაგალითად ჩინეთი მოიყვანა და ციფრულ იუანს მოქალაქეების წინააღმდეგ მიმართული ფინანსური სისტემა უწოდა.

როგორც მანამდე ჩინეთის სახალხო ბანკის ციფრული ვალუტის კვლევის ინსტიტუტის (PBOC) თავმჯდომარემ მუ ჩანჩუნმა (Mu Changchun) განაცხადა, ციფრული იუანი ფინანსური დანაშაულისა და ფულის გათეთრების წინააღმდეგ საბრძოლველად არის შექმნილი, ამიტომ შეუძლებელია ის სრულიად ანონიმური იყოს.

ემერი დარწმუნებულია, რომ ციფრული იუანის დახმარებით ჩინეთის მთავრობას თავის მოქალაქეებზე ჯაშუშობა შეუძლია და თუ აშშ-ში ციფრული დოლარი ამოქმედდება, ამერიკელებსაც იგივე ელით.