კონფიდენციალურობა ადამიანის ფუნდამენტური უფლებაა ბუტერინი

კონფიდენციალურობა ადამიანის ფუნდამენტური უფლებაა ბუტერინი

Ethereum-ის თანადამფუძნებელმა ვიტალიკ ბუტერინმა მხარი დაუჭირა კრიპტომიქსერ Tornado Cash-ის შემქმნელს რომან სტორმს (Roman Storm), რომელიც 2025 წლის აგვისტოში არალიცენზირებული ფულადი გზავნილების სერვისის ექსპლუატაციისთვის გაასამართლეს. ბუტერინის განცხადებით, კონფიდენციალურობის გამაძლიერებელი სერვისების შექმნა დანაშაული არ არის.

მისი თქმით, ასეთი პროგრამული უზრუნველყოფა პერსონალური მონაცემების არასანქცირებული გამოყენებისა და თვალთვალის თავიდან ასაცილებლად შემუშავდა. Ethereum-ის თანადამფუძნებელმა დაწერა, რომ Tornado Cash-ს კანონიერი მიზნებისთვის, კერძოდ, ტექნიკური აღჭურვილობის შესაძენად და ადამიანის უფლებათა დამცველი ორგანიზაციების მხარდასაჭერად თავადაც იყენებდა. მან ხაზგასმით აღნიშნა, რომ კორპორატიული ან სახელმწიფო მონაცემთა ბაზებისგან განსხვავებით, ასეთი სერვისები მუდმივ ჩანაწერებს არ ქმნის.

ბუტერინმა დასძინა, რომ კონფიდენციალურობა ადამიანის ფუნდამენტური უფლებაა, ამიტომ რომან სტორმის პროგრამული უზრუნველყოფის მოდელი არ უნდა იყოს კრიმინალიზებული მხოლოდ იმიტომ, რომ მისი გამოყენება მავნე აქტორების მიერ არის შესაძლებელი.

ბუტერინი შიშობს, რომ მესამე მხარეების მიერ მსგავსი სერვისების უკანონო მიზნებისთვის გამოყენების გათვალისწინებით, სასამართლომ შესაძლოა პროგრამული უზრუნველყოფის შემუშავება სისხლის სამართლის დანაშაულად განსაზღვროს. ბუტერინის მტკიცებით, ასეთი მიდგომით მიზანში დეველოპერების და არა დამნაშავეების ამოღება მოხდება.

მან დაადასტურა, რომ სტორმის იურიდიული დაცვის ფონდში შემოწირულობა პირადად გაიღო. ასევე მნიშვნელოვანი შენატანები ფონდში Ethereum Foundation-ისგან გადაირიცხა. 2025 წლისთვის ფონდმა 6.3 მილიონ დოლარზე მეტი შეაგროვა.

„21-ე საუკუნეში, მსოფლიოს მასშტაბით ადამიანები როგორც ონლაინ, ასევე ოფლაინ სივრცეში კონფიდენციალურობის რისკების წინაშე დგანან. თუ ვინმეს თქვენს შესახებ ინფორმაცია აქვს, მას თქვენი ექსპლუატაცია სოციალური, კომერციული და ფიზიკური მიზნებისთვის შეუძლია. ადამიანებს უნდა შეეძლოთ იმის არჩევა,თუ ვის გაუზიარონ პირადი ცხოვრების, მეგობრებთან და კოლეგებთან კომუნიკაციის, მდებარეობისა და ფინანსების შესახებ ინფორმაცია .“- წერს ბუტერინი.

2022 წელს აშშ-ის ფინანსთა სამინისტრომ კრიპტოვალუტის მიქსერი Tornado Cash შავ სიაში შეიყვანა. მიზეზად ჩრდილოეთ კორეული ჰაკერების ჯგუფის Lazarus-ის მიერ მოპარული ციფრული აქტივების გასათეთრებლად მისი გამოყენება დასახელდა. აშშ-ის ფინანსთა სამინისტროს უცხოური აქტივების კონტროლის ოფისმა (OFAC) ამერიკელებს Tornado Cash-ის გამოყენება აუკრძალა, თუმცა სანქციები საბოლოოდ 2025 წლის მარტში მოიხსნა.

2023 წელს სტორმს ფულის გათეთრების მიზნით შეთქმულებაში, სანქციების დარღვევასა და არალიცენზირებული ფულადი გზავნილების განხორციელებაში წაუყენეს ბრალი. გასული წლის აგვისტოში ნიუ-იორკის სამხრეთ ოლქის ნაფიცმა მსაჯულებმა სტორმი რიგ ბრალდებებში დამნაშავედ ცნეს და მას ხუთ წლამდე თავისუფლების აღკვეთა ემუქრება.

წყარო: https://www.theblock.co/post/384886/vitalik-buterin-tornado-cash-developer-appeal