კრიპტობართმა Trastra EU გაკოტრების პროცესი დაიწყო

კრიპტობართმა Trastra EU გაკოტრების პროცესი დაიწყო

გამოცემა Coinidol-ის ცნობით, ლიეტუვურმა კრიპტოვალუტის სერვისის პროვაიდერმა Trastra EU-მ გაკოტრების პროცესი დაიწყო, რის შედეგადაც მომხმარებლებს კრიპტოვალუტისა და ფიატური თანხების გაყინვის შესახებ ეცნობათ.

ფინტექ პროექტი Trastra EU 2017 წელს დაარსდა. ის ევროპელ მომხმარებლებს კრიპტოვალუტის საფულეებისა და Visa-ს გადახდის ბარათების გახსნის შესაძლებლობას სთავაზობდა.

როგორც Coinidol იუწყება, 2021 წელს Trastra-ს საგადახდო ბარათი რეგისტრაციის სიმარტივისა და პირადი IBAN საიდენტიფიკაციო ნომრების მხარდაჭერის გამო ბიტკოინებითა და სხვა ციფრული აქტივებით ტრანზაქციებისთვის ერთ-ერთ საუკეთესო ინსტრუმენტად ითვლებოდა.

კომპანიის გარშემო სიტუაცია 2024 წლის თებერვალში დაიძაბა, როდესაც TRASTRA Visa კრიპტოვალუტის გადახდის ბარათებმა მუშაობა შეწყვიტეს და სერვისი ახალ საბანკო პარტნიორს გადაეცა.

2025 წლის იანვრის დასაწყისში კომპანიამ მისი დამფუძნებლის და ბიზნესზე მნიშვნელოვანი გავლენის მქონე პირის – რომან პოტიომკინის თანამდებობიდან გათავისუფლების შესახებ გამოაცხადა.

მარტში, Trastra-ს კლიენტებს ელექტრონული ფოსტის მეშვეობით კომპანიის შესაძლო გადახდისუუნარობის შესახებ ეცნობათ, იმ შემთხვევაში, თუ კრედიტორებთან შეთანხმებას ვერ მიაღწევდნენ.

საბოლოოდ, 9 ივნისს კრიპტოვალუტის სერვისის პროვაიდერმა გაკოტრების საქმის წარმოების დაწყებისა და კლიენტის აქტივების დაბლოკვის შესახებ გამოაცხადა. სერვისის დამფუძნებელი ყველა კრედიტორს კომპენსაციას დაჰპირდა.

თუმცა, უშუალოდ გაკოტრების შესახებ განცხადება ოფიციალურ დოკუმენტად არც კომპანიის ვებსაიტზე და არც სხვა საჯარო რესურსებზე არ გამოქვეყნებულა.

არ დაკონკრეტებულა არც კლიენტებისთვის კომპემსაციის გადახდის პირობები და გაყინული თანხების ოდენობა.

Trastra-ს ოფიციალურ განცხადებებში კომპანიის ფინანსური სირთულეების მიზეზები არ სახელდება. კომპანიის ვებსაიტი და აპლიკაცია კვლავაც ფუნქციონირებს, ახალ მომხმარებლებს კი რეგისტრაციის შესაძლებლობა ეძლევათ.

დაახლოებით ერთი წლის წინ, Trastra-ს გუნდმა SWIFT-ის ბანკთაშორისი სისტემის მეშვეობით „კრიპტო-მეგობრული“ გადარიცხვების დაწყების შესახებ გამოაცხადა.

კომპანიის წარმომადგენლების განცხადებით, ეს გადაწყვეტა საერთაშორისო ტრანზაქციებს ამარტივებს, რადგან კლიენტებს SWIFT-ის სტანდარტის სანდოობისა და ციფრული აქტივების დეცენტრალიზებული ბუნების დაკავშირების შესაძლებლობა ეძლევათ.