კრიპტობირჟა Gemini თანამშრომლების ნაწილს გაათავისუფლებს

კრიპტობირჟა Gemini თანამშრომლების ნაწილს გაათავისუფლებს

სავაჭრო პლატფორმამ Gemini კრიპტო ბაზრის დაცემისა და გლობალური ინფლაციის მიზეზით პერსონალის ოპტიმიზაცია გამოაცხადა.

 კრიპტოვალუტის ბირჟა Gemini-ს დამფუძნებლებმა ქემერონ ჰოვარდ ვინკლვოსმა და ტაილერ ჰოვარდ ვინკლვოსმა (Cameron Howard Winklevoss, Tyler Howard Winklevoss) სავაჭრო პლატფორმის ოფიციალურ ბლოგზე  თანამშრომლების 10%-ით შემცირების შესახებ გამოაცხადეს. განთავისუფლებული თანამშრომლების ზუსტი რაოდენობა არ სახელდება,

მაგრამ Gemini-ს LinkedIn-ის გვერდის მიხედვით, კომპანიაში 1000-ზე მეტი ადამიანია დასაქმებული, რაც შესაძლოა  100-ზე მეტი სამუშაო ადგილის გაუქმებას ნიშნავდეს.

2014 წელს დაარსების დღიდან ეს არის პირველი შემთხვევა, როდესაც Gemini-მ შემცირება გამოაცხადა. განცხადებაში ნათქვამია,

რომ შტატის გადახედვა კრიპტოვალუტის ბაზრის დაღმავალი ტენდენციის ფონზე ხდება.

„ახლა ჩვენ  შემცირების ფაზაში ვიმყოფებით, სტაგნაციის პერიოდში – რომელსაც ჩვენი ინდუსტრია კრიპტოზამთარს უწოდებს.

ამ ყველაფერს  მაკროეკონომიკური და გეოპოლიტიკური რყევები ამწვავებს. ამ მხრივ , როგორც კომპანია ჩვენ მარტონი არ ვართ.“ – წერენ მილიარდერი ვინკლვოსები თავიანთ ბლოგზე.

ტყუპების თქმით, ბირჟა Gemini ფოკუსირებას მხოლოდ იმ პროდუქტებზე აპირებს, რომლებიც კომპანიის მისიისთვის გადამწყვეტია. მით უმეტეს, რომ ამჟამინდელი  ბაზრის არასტაბილური პირობები „სავარაუდოდ, გარკვეული პერიოდის განმავლობაში გაგრძელდება“. ძმების განცხადებით, Gemini-ს ოფისები 2 ივნისიდან დაიხურება. კომპანია თანამშრომლებთან სამსახურიდან გათავისუფლებისა და ჯანდაცვის შეღავათებთან დაკავშირებით ონლაინ გასაუბრების გამართვას აპირებს. პარასკევს, 2 ივნისს, ტყუპები კომპანიის მომავლის განსახილველად კორპორატიული ღონისძიების გამართვას გეგმავენ.

„დღეს მძიმე დღეა, მაგრამ ეს Gemini-ს გრძელვადიან პერსპექტივაში უკეთესს გახდის.“- განაცხადეს ძმებმა.

ამრიგად, Gemini უერთდება უამრავ კრიპტოკომპანიას და სერვისს, რომლებმაც  ბოლო თვეებში სამუშაო ადგილების რაოდენობა შეამცირეს. მათ შორის არიან: Buenbit, Bithumb და BitMEX.