კრიპტობროკერმა Voyager Digital გაკოტრების შესახებ გამოაცხადა

კრიპტობროკერმა Voyager Digital გაკოტრების შესახებ გამოაცხადა

სამმა კომერციულმა კომპანიამ – Voyager Digital Holdings, Voyager Digital LLC და Voyager Digital Ltd –  ნიუ-იორკის სამხრეთ ოლქის სასამართლოში გაკოტრების შესახებ  სამი იდენტური შუამდგომლობა შეიტანა.

კრიპტოვალუტის ბროკერმა Voyager Digital აშშ-ის გაკოტრების კოდექსის მე-11 თავის დებულებების შესაბამისად რეორგანიზაციის პროცედურა წამოიწყო.

მე-11 თავის თანახმად, ნებისმიერ კორპორატიულ ორგანიზაციას შეუძლია თავი გაკოტრებულად გამოაცხადოს.

ამასთან, კომპანია არ წყვეტს არსებობას, არამედ კომერციული საქმიანობის გაგრძელების პარალელურად  უფლებას იღებს  სავალო ვალდებულებების რესტრუქტურიზაცია და ბიზნესის რეორგანიზაცია მოახდინოს.

ამგვარად, Voyager-მა თავისი აქტივების სასამართლოს გზით დაცვას მიმართა. შედეგად, კრედიტორები ვერ შეძლებენ კომპანიას იმ თანხების მიღებაზე შეედავონ, რომლებიც მათ გაკოტრების პროცესში  ერგებათ.

გასულ პარასკევს არსებული საბაზრო პირობების მომიზეზებით, Voyager-მა თანხების გატანა, დეპოზიტები და ვაჭრობა შეაჩერა.

„ეს უკიდურესად რთული გადაწყვეტილება იყო, მაგრამ მიგვაჩნია, რომ არსებული საბაზრო პირობების გათვალისწინებით ეს გადაწყვეტილება სწორია.“ – თქვა მაშინ აღმასრულებელმა დირექტორმა სტივენ ერლიხმა (Stephen Ehrlich).

Voyager Digital Holdings-ის მონაცემებით, კომპანიის კრედიტორთა საერთო რაოდენობა 100 000-ს აჭარბებს, მისმა ფინანსურმა ვალდებულებამ კი შესაძლოა 10 მილიარდი დოლარი შეადგინოს.

Voyager-ის ცნობით, კომპანიას პლატფორმაზე დაახლოებით 1,3 მილიარდი დოლარი აქვს, 350 მილიონზე მეტი Metropolitan Commercial Bank-ის ანგარიშზე,

დაახლოებით 110 მილიონი დოლარი კი ფიატური ფულისა და საკუთარი კრიპტო აქტივების სახით.