კრიპტოვალუტებით საბაზრო მანიპულაციები ყველგან ხდება

კრიპტოვალუტებით საბაზრო მანიპულაციები ყველგან ხდება

აშშ-ის ფასიანი ქაღალდებისა და ბირჟების კომისიის (SEC) თავმჯდომარის განცხადებით, საბაზრო მანიპულაციების მაგალითი, რომელსაც კრიპტო ბირჟა FTX-ის მხრიდან ჰქონდა ადგილი, კრიპტო ინდუსტრიაში ერთეულ შემთხვევას არ წარმოადგენს.

სენატის კომიტეტის ერთ-ერთ სხდომაზე გერი გენსლერმა (Gary Gensler) განაცხადა, რომ მომხმარებელთა ნდობის ბოროტად გამოყენება და კლიენტების სახსრებით სარგებლობა არაერთ არსებულ კრიპტო პლატფორმაზე შეინიშნება.

გენსლერმა ხაზი ტრადიციულ საფონდო ბირჟებსა და კრიპტო ბირჟებს შორის არსებულ განსხვავებას გაუსვა. კერძოდ კი იმას, რომ კრიპტო ბირჟები ხშირად ისეთი სახის საქმიანობას ეწევიან, რომელიც ტრადიციულ საფონდო ბირჟებზე აკრძალულია.

„საფონდო ბირჟა NYSE-ს არ შეუძლია მართოს ჰეჯ-ფონდი და საკუთარი მომხმარებლების წინააღმდეგ ივაჭროს. ისევე როგორც არ შეუძია გაუსწროს ბაზარს და საკუთარი მომხმარებლები უკან ჩამოიტოვოს. მაშინ, როცა კრიპტო ინდუსტრიაში ეს უამრავ ბირჟაზე ხდება: ისინი ყველა ამ ფუნქციას აერთიანებენ.“ – განმარტა თავისი პოზიცია გენსლერმა.

გენსლერის საპასუხოდ, ტენესის შტატის რესპუბლიკელმა სენატორმა ბილ ჰეგერტიმ (Bill Hagerty) შეერთებულ შტატებში კრიპტოვალუტის რეგულირებასთან დაკავშირებით სიცხადის ნაკლებობის გამო შეშფოთება გამოთქვა.

მისი აზრით, სწორედ რეგულირებაში არსებული გაურკვევლობა უბიძგებს კრიპტოვალუტის ბირჟებს ოფშორებში ფუნქციონირებისკენ, რასაც გენსლერი კატეგორიულად არ დაეთანხმა და განაცხადა, რომ ამას მხოლოდ ის კომპანიები აკეთებენ, რომლებმაც გადაწყვიტეს აშშ-ს ფასიანი ქაღალდების შესახებ კანონებს არ დაემორჩილონ.

„კრიპტოვალუტების აბსოლუტური უმრავლესობა ფასიანი ქაღალდების შესახებ კანონს ექვემდებარება, კრიპტოვალუტის ბირჟები კი
საკუთარ მომხმარებლებს სრულ ინფორმაციას არ აწვდიან. კანონის არ მოწონება და კანონის დარღვევა გაურკვევლობისგან განსხვავდება. საფინანსო კომპანიებისთვის მოქმედი კანონები საკმარისად ცხადია.“ – ამბობს გენსლერი.

ცოტა ხნის წინ გარი გენსლერმა განაცხადა, რომ იმ შემთხვევაშიც კი თუ კრიპტო პლატფორმები მათი რეზერვებისა და ფინანსური რისკების შესახებ ინფორმაციას სრულად გაასაჯაროვებენ, ეს მათ მარეგულირებლის მკაცრი ზედამხედველობისგან მაინც ვერ დაიცავს.