კრიპტოვალუტის რეგულირების კანონი ევროპას ქვის ხანაში დააბრუნებს

კრიპტოვალუტის რეგულირების კანონი ევროპას ქვის ხანაში დააბრუნებს

MakerDAO-ს თანადამფუძნებელი რუნე კრისტენსენი შიშობს, რომ ევროკავშირში კრიპტოვალუტების რეგულირების შესახებ კანონმა (MiCA) შესაძლოა რეგიონში DeFi პროექტების განვითარება შეაფერხოს.

რუნე კრისტენსენის (Rune Christensen) განმარტებით,  შესაძლოა ევროპულმა ფინანსურმა მარეგულირებლებმა DeFi-ის ყოველ სამომხმარებლო ინტერფეისს სავალდებულო რეგისტრაციის გავლა და ევროპაში მუშაობისთვის ლიცენზიის მიღება მოსთხოვონ.

კრისტენსენი შიშობს, რომ ეს მომხმარებელთა უმეტესობას, რომლებსაც პროტოკოლებთან უშუალო ურთიერთობის გამოცდილება არ გააჩნიათ, DeFi-ზე წვდომას გაურთულებს. მუშაობას მხოლოდ დეცენტრალიზებული ან ლოკალურად დატვირთული ინტერფეისები შეძლებენ, ისევე როგორც ინტერფეისები, რომლებიც Know Your Customer (KYC) პროცედურებს მოიცავენ, განაცხადა კრისტენსენმა.

„DeFi ინტერფეისების რეგულარულ ინტერნეტ დომენებზე გამოყენება შეუძლებელი გახდება. ეს ევროპაში დეცენტრალიზებული ფინანსების რეგრესს გამოიწვევს მაშინ, როცა დანარჩენ მსოფლიოში გარე ინტერფეისები ნორმალურად განაგრძობენ ფუნქციონირებას. კრიპტოვალუტის ინდუსტრია ევროკავშირში ქვის ხანას დაემსგავსება“ – განაცხადა კრისტენსენმა.

როგორც Tradingstrategy-ის თანადამფუძნებელმა მიკო ოჰტამაამ (Mikko Ohtamaa) განმარტა, ზემოაღნიშნული ზომები შესაძლოა 2023 წელს ფულის გათეთრებასთან ბრძოლის სამუშაო ჯგუფის (FATF) რეკომენდაციების საფუძველზე განხორციელდეს.

თუმცა, ცალკეული ევროპული ქვეყნების მარეგულირებელმა ორგანოებმა შესაძლოა ეს წესები „ბრმად“ არ დაიცვან და სულაც უგულებელყონ ისინი.

ესპანეთის ცენტრალური ბანკის მონაცემების თანახმად, ევროპელი კრიპტო ინვესტორები უპირატესობას DeFi პროექტებს ანიჭებენ.

2022 წელს ევროკომისიამ Ethereum-ის ქსელში DeFi პროექტების საქმიანობის ავტომატური მონიტორინგის სისტემის შემუშავების გეგმების შესახებ გამოაცხადა.