კრიპტოვალუტის საკითხებში აშშ-მ ჩინეთს უნდა გაუსწროს

კრიპტოვალუტის საკითხებში აშშ-მ ჩინეთს უნდა გაუსწროს

აშშ-ის პრეზიდენტმა დონალდ ტრამპმა კრიპტოვალუტების მიმართ მხარდაჭერა კიდევ ერთხელ გამოთქვა და განაცხადა, რომ შეერთებულმა შტატებმა ციფრული აქტივების საკითხში ლიდერობა უნდა შეინარჩუნოს, წინააღმდეგ შემთხვევაში, ის ჩინეთის მსგავს დიდ სახელმწიფოებს ჩამორჩება.

ტრამპმა აღნიშნა, რომ კრიპტოვალუტები ფართოდ აღიარებულ აქტივების ისეთ კლასად იქცა, რომელიც მდგრადობას ბაზრის ვარდნის დროსაც ინარჩუნებს. აშშ-ს პრეზიდენტი მიიჩნევს, რომ კრიპტო ინდუსტრიის მხარდაჭერა შეერთებულ შტატებს მსოფლიო ეკონომიკაში წამყვანი პოზიციის დაჭერაში დაეხმარება და ჩინეთს გლობალურ ფინანსურ სისტემაზე კონტროლის მოპოვებაში შეუშლის ხელს.

ტრამპმა კომენტარი აშშ-სა და ჩინეთს შორის ხელოვნური ინტელექტის (AI), ბლოკჩეინისა და სხვა ტექნოლოგიური მიღწევების სფეროში მზარდი კონკურენციის ფონზე გააკეთა. აშშ-ის პრეზიდენტი შიშობს, რომ ტექნოლოგიების სფეროზე ჩინეთის მზარდი გავლენა შესაძლოა კრიპტოვალუტებზეც აისახოს.

„მე კრიპტოვალუტების დიდი მოყვარული ვარ და მინდა, რომ ისინი ჩინეთისგან შორს იყოს. კრიპტოვალუტები პოპულარული მიმართულებაა, რომელიც არც ისე დიდი ხნის წინ გაჩნდა და სწრაფად ვითარდება. თუ ჩვენ მას არ განვავითარებთ, ამას ჩინეთი გააკეთებს .“- თქვა ტრამპმა.

აშშ-ს მოქმედმა პრეზიდენტმა ჯო ბაიდენის დროინდელი აშშ-ის ყოფილი ადმინისტრაცია გააკრიტიკა. კრიპტოვალუტების მიმართ ადრე მიღებული მკაცრი პოლიტიკის გამო, არაერთი კომპანია აშშ-ის ფასიანი ქაღალდებისა და ბირჟების კომისიის (SEC) მიერ სისხლის სამართლის პასუხისგებაში მიცემის ობიექტი გახდა.

იანვარში, ტრამპის ხელმძღვანელობით, სააგენტომ კრიპტოვალუტის სამუშაო ჯგუფი შექმნა. სამუშაო ჯგუფი უკვე მართავს საჯარო დისკუსიებს დეცენტრალიზებული ფინანსების (DeFi), კრიპტოვალუტებისა და აქტივების ტოკენიზაციის რეგულირების შესახებ.

ცოტა ხნის წინ, ცენტრალური სადაზვერვო სააგენტოს (CIA) დირექტორის მოადგილემ, მაიკლ ელისმა, კრიპტოვალუტები ისეთ ინსტრუმენტად მოიხსენია, რომელიც შეერთებულ შტატებს ტექნოლოგიურ და ეკონომიკურ კონკურენტებთან ბრძოლაში დაეხმარება, რომელთაგან ერთ-ერთი ჩინეთია.