კრიპტოვალუტის სფეროში თაღლითობა 183%-ით გაიზარდა

კრიპტოვალუტის სფეროში თაღლითობა 183%-ით გაიზარდა

აშშ-ს გამოძიების ფედერალური ბიუროს ცნობით, 2022 წელს კრიპტოვალუტის თაღლითობის შემთხვევების რაოდენობა 183%-ით გაიზარდა, რაც თანხაში დაახლოებით 2,57 მილიარდი აშშ დოლარით აისახა. 2021 წელს ამ მაჩვენებელმა 907 მილიონი აშშ დოლარი შეადგინა.

FBI-ის ინტერნეტ დანაშაულის შესახებ წარდგენილი ანგარიშის 2022 წლის მონაცემები ინტერნეტ დანაშაულის საჩივრების ცენტრიდან (IC3) მოპოვებულ ინფორმაციას ეფუძნება.

უწყების ცნობით, ფინანსურ ინვესტიციებთან დაკავშირებული თაღლითობის შესახებ საჩივრების რაოდენობა მთლიანობაში 127%-ით გაიზარდა. 2021 წელს ინტერნეტ თაღლითობის შედეგად მიღებული ზარალი 1,45 მილიარდ დოლარს შეადგენდა, მაშინ, როცა 2022-ში ის 3,31 მილიარდ დოლარამდე გაიზარდა.

„ციფრულ აქტივებში ინვესტიციებთან დაკავშირებულმა თაღლითობამ დაზარალებულთა რიცხვის უპრეცედენტო ზრდა გამოიწვია.  ბევრმა ინვესტორმა კრიპტოვალუტების სქემებში წარუმატებელი ინვესტიციების შედეგად დანაკარგის ასანაზღაურებლად უზარმაზარი ვალები დაიდო. ყველაზე ხშირად თაღლითებს მიზანში 30-დან 49 წლამდე ადამიანთა ასაკობრივი ჯგუფი ჰყავს ამოღებული.“—აცხადებენ FBI-ის ექსპერტები.

ბიუროს განცხადებით, ყველაზე გავრცელებული კრიპტო დანაშაულებები სოციალური ქსელების ანგარიშების გატეხვას, ცნობილი ადამიანების სახელით ოპერირებას, ასევე უძრავი ქონებისა და დასაქმების სფეროში მომუშავე კომპანიების თანამშრომლების სახელით მოქმედებას უკავშირდება.

FBI-ის თანახმად, ზემოთხსენებული სქემების გამოყენებით თაღლითებმა 2 მილიარდამდე დოლარის გამოძალვა შეძლეს.

ცოტა ხნის წინ, FBI-მ ინტერნეტის მომხმარებლები ახალი თაღლითური სქემის შესახებ გააფრთხილა.

ბოროტმოქმედები ბლოკჩეინზე Play-to-Earn („ითამაშე და იშოვე“) კონცეფციის მიხედვით ერთი შეხედვით თამაშის ტიპის აპლიკაციებს ქმნიან. ამ აპლიკაციების ჩამოტვირთვის შედეგად კი მომხმარებლები კრიპტო აქტივებს კარგავენ.