კრიპტო ბირჟას Coinbase wBTC-ის დელისტინგისთვის უჩივიან

კრიპტო ბირჟას Coinbase wBTC-ის დელისტინგისთვის უჩივიან

ჰონკონგში დაფუძნებული კომპანია BiT Global, რომელიც Tron-ის დამფუძნებელ ჯასტინ სუნთან არის დაკავშირებული, ე.წ „შეფუთული ბიტკოინის“ (wBTC) დელისტინგისა და მისი კონკურენტი ტოკენით – cbBTC-ით ჩანაცვლებისთვის ამერიკულ კრიპტო ბირჟა Coinbase-ს უჩივის.

BiT Global-ის წარმომადგენელი იურიდიული ფირმა Kneupper & Covey-ის მტკიცებით, Coinbase-ის მიერ wBTC-ის დელისტინგთან დაკავშირებული გადაწყვეტილება ჯანსაღი კონკურენციის პრინციპებს ეწინააღმდეგება და ფედერალურ კანონებს არღვევს. იურისტების თქმით, პლატფორმიდან ტოკენების ამოღება BiT Global-ისთვის ზიანის მომტანია.

„ეს გადაწყვეტილება კრიპტო სივრცისთვის ცუდ პრეცედენტს ქმნის. ვინ იგრძნობს თავს უსაფრთხოდ, როცა Coinbase-ის მსგავს მსხვილ ბირჟას, საკუთარი კონკურენტული პროდუქტის გამოშვების დაგეგმვისას, რომელიმე კრიპტოვალუტის ლისტინგიდან ამოღება შეუძლია? და ვინ იქნება შემდეგი? – აღშფოთება გამოხატა ადვოკატმა კევინ კნოუპერმა (Kevin Kneupper).

Coinbase-ის მიერ wBTC-ის დელისტინგის გამოცხადებამდე რამდენიმე თვით ადრე კუსტოდიალურმა სერვისმა BitGo აქტივის მარაგების სამ ორგანიზაციას შორის განაწილების შესახებ განაცხადა.

2019 წლის იანვარში ტოკენის ამოქმედების მომენტიდან wBTC-ის ძირითად მფლობელს BitGo წარმოადგენდა. ახალი გარიგების თანახმად, აქტივზე კონტროლი კომპანიებს BitGo, BiT Global Trust და BiT Global-ს ექნებათ.

კრიპტო საზოგადოება BitGo-ს ჯასტინ სანთან და Tron-ის ეკოსისტემასთან სტრატეგიულ პარტნიორობას სკეპტიკურად შეხვდა. დეცენტრალიზებული ფინანსების სფეროს (DeFi) წარმომადგენელმა მსხვილმა კომპანიებმა, კერძოდ კი MakerDAO-მ და Aave-მ wBTC-ის გირავნობის აქტივიდან გამორიცხვის შესაძლებლობების შესწავლა დაიწყეს, თუმცა ჯერ ეს არ განუხორციელებიათ.

Coinbase-ის წარმომადგენელთა განმარტებით, ბირჟა ლისტინგის მაღალი სტანდარტების დაცვას ცდილობს, რის გამოც პლატფორმაზე არსებული აქტივების რეგულარული შეფასება ხდება. თუ კრიპტო აქტივი მოცემულ სტანდარტებს არ აკმაყოფილებს, ის ბირჟაზე ვაჭრობისთვის მიუწვდომელი ხდება.

ამაზე საპასუხოდ, Kneupper & Covey-მ აღნიშნეს, რომ ბოლო კვირების განმავლობაში Coinbase-მა პლატფორმაზე რამდენიმე „ყოვლად უსარგებლო“ მემკოინი განათავსა.

იურისტების მტკიცებით, wBTC-მ საკუთარი ღირებულება და სტანდარტებთან შესაბამისობა დაამტკიცა, მაგრამ Coinbase-მა წესები შეცვალა და ტოკენი გაყიდვიდან მას შემდეგ ამოიღო, რაც ტოკენის „საკუთარი კლონის“- cbBTC-ის პლატფორმაზე განთავსება მოახდინა.

Coinbase-მა Bitcoin-ის ტოკენიზებული ვერსია cbBTC  Ethereum-ისა და Base-ის ქსელებში სექტემბერში აამოქმედა. ამჟამად cbBTC-ის საბაზრო კაპიტალიზაცია 2 მილიარდ დოლარს აჭარბებს, მაშინ როცა wBTC-სთვის ეს მაჩვენებელი 13,4 მილიარდ დოლარზე მეტია.