კრიპტო თაღლითებმა ავსტრალიელებს 80 მილიონი მოპარეს

კრიპტო თაღლითებმა ავსტრალიელებს 80 მილიონი მოპარეს

ავსტრალიის კონკურენციისა და მომხმარებელთა უფლებების დაცვის კომისიის (ACCC) განცხადებით, კრიპტოვალუტების შესახებ ყველაზე ნაკლებად ინფორმირებული ქვეყნის მოქალაქეები უფრო მეტად ზარალდებიან, ვიდრე სხვები.

ACCC ცნობით, 2022 წელს კრიპტოვალუტის თაღლითობის შემთხვევების რაოდენობა გაიზარდა.

საზედამხედველო ორგანოს მონაცემებით, 1 იანვრიდან 1 მაისამდე პერიოდში ავსტრალიელმა კრიპტო-ინვესტორებმა კრიპტო თაღლითობის შედეგად  81,5 მილიონი დოლარი დაკარგეს.

ამავე დროს, წლის დასაწყისიდან ავსტრალიელებმა თაღლითური ქმედებების შედეგად ჯამში 148 მილიონი დოლარი დაკარგეს, რაც ნიშნავს, რომ წელს ავსტრალიაში კრიპტო თაღლითობა საერთო დანაშაულებათა ნახევარზე მეტს შეადგენს. 

გასული წლის განმავლობაში მოქალაქეების მიერ რეგისტრირებული ფულადი ზარალის უმეტესი ნაწილი სწორედ საინვესტიციო თაღლითობასთან იყო დაკავშირებული.

ACCC-ის მონაცემებით, იანვარ-აპრილში მოპარული თანხების ჯამური რაოდენობა გასული წლის იმავე პერიოდთან შედარებით 314%-ით არის გაზრდილი.

კომისიის ვიცე-თავმჯდომარემ დელია რიკარდმა (Delia Rickard) თანამოქალაქეებს ურჩია, სიფრთხილით მოეკიდონ ყველას, ვინც ინვესტიციის ჩადებას ან ფულის გადარიცხვას ციფრული აქტივების გამოყენებით ითხოვს. განსაკუთრებით იმ შემთხვევაში, თუ ნაცნობობა ონლაინ შედგა.

რიკარდის თქმით, ადამიანებს თაღლითობის მიმართ უფრო დაუცველებს ინდუსტრიის ნიუანსების არ ცოდნა  ხდის.

 ACCC-ს განცხადებით, კრიპტო დანაშაულის შედეგად მიღებული ზარალის რეალური მასშტაბი, სავარაუდოდ, გაცილებით მაღალია,

რადგან მის შესახებ ადამიანების მხოლოდ 13% აცხადებს.

კომისიამ ხაზგასმით აღნიშნა, რომ მიუხედავად იმისა, რომ შეტყობინებების რაოდენობა ოდნავ შემცირდა, ზარალის დაფიქსირებული ოდენობა, პირიქით, შესამჩნევად გაიზარდა.

მარეგულირებელმა აღნიშნა, რომ შემთხვევების რაოდენობით კრიპტო თაღლითობამ ტრადიციული ვალუტით მანიპულაციებს მნიშვნელოვნად გაუსწრო. კრიპტოვალუტაზე ბევრი ბოროტმოქმედი გადაერთო, რადგან ამგვარად მსხვერპლის სუპერ მაღალი მოგების მიღებაში დარწმუნება გაცილებით ადვილია.

ამასთან დაკავშირებით, ინვესტორების დაცვის უზრუნველსაყოფად, ავსტრალიურმა მომხმარებელთა ადვოკატირების ჯგუფმა Choice ციფრული ვალუტის ბაზრის რაც შეიძლება მალე დარეგულირების მოწოდება გამოაქვეყნა.