კრიპტო კომპანიები შეერთებულ შტატებს ტოვებენ

კრიპტო კომპანიები შეერთებულ შტატებს  ტოვებენ

Ripple-ის აღმასრულებელი დირექტორის, ბრედ გარლინგჰაუსის განცხადებით, აშშ-ს სულ უფრო მეტი კრიპტოვალუტისა და ფინტექ კომპანია ტოვებს, რაც ქვეყანაში ინოვაციების განვითარებას აფერხებს.

ბრედ გარლინგჰაუსი (Brad Garlinghouse)  მიიჩნევს, რომ შეერთებული შტატებიდან კრიპტოვალუტის კომპანიების სხვა იურისდიქციებში გადასვლა ქვეყანაში ინოვაციების განვითარებას ჯერ შეაფერხებს, შემდეგ კი საერთოდ შეაჩერებს.

ამიტომ, დარჩენილი კომპანიების შესანარჩუნებლად Ripple-ის ხელმძღვანელმა ხელისუფლებას მოუწოდა,  ციფრული აქტივების რეგულირების მკაფიო წესები რაც შეიძლება მალე მიიღონ.

გარლინგჰაუსი აშშ-ს ფასიანი ქაღალდებისა და ბირჟების კომისიის (SEC) მიერ Ripple-ის წინააღმდეგ შეტანილ სარჩელსაც შეეხო.

უწყების მტკიცებით, Ripple-მა ფასიანი ქაღალდების შესახებ კანონის დარღვევით დაურეგისტრირებელი ICO ჩაატარა.

გარლინგჰაუსის თქმით, SEC-ის ბრალდება კრიპტოვალუტის ყველა ემიტენტისკენ არის მიმართული და რომ მარეგულირებელმა  მთელ ინდუსტრიას „ომი გამოუცხადა“.

ამასთან, Ripple-ის ხელმძღვანელი დარწმუნებულია, რომ კომპანია სასამართლოში საქმის მოგებას მიმდინარე წლის პირველ ნახევარში შეძლებს.

„ჩვენ ოპტიმისტურად ვართ განწყობილნი და გვჯერა, რომ სასამართლო პროცესი 2023 წელს დასრულდება. შესაძლოა, წლის პირველ ნახევარშიც. დარწმუნებული ვარ, რომ კანონი და ფაქტები ჩვენს მხარესაა“ – განაცხადა გარლინგჰაუსმა.

მან ასევე SEC-ის თავმჯდომარის გარი გენსლერის (Gary Gensler) ბოლო განცხადება გააკრიტიკა, რომელმაც ცოტა ხნის წინ ბიტკოინის გარდა ყველა კრიპტოვალუტას ფასიანი ქაღალდები უწოდა.

გარლინგჰაუსი მიიჩნევს, რომ დეპარტამენტის ეს პოზიცია დავის მოგვარებას აფერხებს.