კრიპტო კომპანიებში ქალების ანაზღაურება მამაკაცების ანაზღაურებაზე 15%-ით მაღალია

კრიპტო კომპანიებში ქალების ანაზღაურება მამაკაცების ანაზღაურებაზე 15%-ით მაღალია

Pantera Capital-ის ექსპერტების მიერ ჩატარებული გამოკითხვის თანახმად, კრიპტო კომპანიებში ქალები თითქმის 15%-ით მეტს გამოიმუშავებენ ვიდრე მამაკაცები, ასევე, უფრო ხშირად იკავებენ მაღალ თანამდებობებს.

გამოკითხვა 4 ივნისი – 20 ივლისის პერიოდში ჩატარდა და მისი შედეგების მიხედვით, ქალების საშუალო წლიური ხელფასი 172 000 აშშ დოლარს შეადგენს, მაშინ, როცა მამაკაცების საშუალო წლიური ხელფასი 150 000 აშშ დოლარია.

„ხელფასების ასეთი სხვაობა, შესაძლოა ნაწილობრივ სქესთა შორის არსებული განსხვავებული გამოცდილებით იყოს განპირობებული. კრიპტო ინდუსტრიაში ქალები უფრო გამოცდილნი არიან, მათი გამოცდილება საშუალოდ 5 წელზე მეტს მოიცავს და ხშირად საშუალო და მაღალი დონის პოზიციებს იკავებენ. ამავე დროს, მამაკაცების უმეტესობა კრიპტო ინდუსტრიაში გადასვლისას საწყის პოზიციებს იკავებს.“- აღნიშნავენ ანალიტიკოსები.

Pantera Capital Research-მა ხაზგასმით აღნიშნა, რომ საბაზო ხელფასიდან გამომდინარე, მამაკაცის მიერ გამომუშავებულ ყოველ 1 დოლარზე ქალის 1,15 დოლარი მოდის, ხოლო კომპანიებში, რომლებიც კრიპტოვალუტის ინდუსტრიასთან არ არიან დაკავშირებული, ეს მაჩვენებელი ქალებისთვის 84 ცენტია.

ანალიტიკოსების თქმით, კრიპტო ინდუსტრიაში ქალების მუშაობის საშუალო ვადა 5,3 წელია, ხოლო მამაკაცების 4,5 წელი. ამჟამად Web3 სექტორი სამედიცინოს შემდეგ ერთ-ერთი ყველაზე მაღალანაზღაურებადია.  ინდუსტრიაში ქალების ყოველკვირეული საბაზისო ხელფასი მინიმუმ 3000 დოლარს შეადგენს.

Pantera Capital-მა ყურადღება იმაზე გაამახვილა, რომ კრიპტო კომპანიებში დასაქმებულ ქალებს აქვთ მაღალი კომპეტენცია, სტრესის მიმართ მდგრადობა და მოქნილობა გადაწყვეტილებების მიღებისას, რაც მათ ხელფასებზე ასევე დადებითად აისახება.