ლაგარდი ციფრული ევროს უსაფრთხოების გარანტიას იძლევა

კრისტინ ლაგარდი ციფრული ევროს უსაფრთხოების გარანტიას იძლევა

ევროპის ცენტრალური ბანკის (ECB) პრეზიდენტს კრიპტოვალუტაში ინვესტიცია არასდროს განუხორციელებია, თუმცა დარწმუნებულია, რომ სახელმწიფო ციფრული ვალუტისგან განსხვავებით, კრიპტო აქტივებს ღირებულება არ გააჩნიათ.

კრისტინ ლაგარდმა (Christine Lagarde) ინტერვიუში განაცხადა, რომ ის ციფრული ევროს უსაფრთხოების გარანტიას იძლევა, რადგან მის უკან ECB დგას:

„ყოველთვის ვამბობდი, რომ კრიპტო აქტივები ძალიან სპეკულაციური და სარისკოა. ჩემი ძალიან მოკრძალებული შეფასება იმას ეყრდნობა,

რომ მათ ღირებულება არ გააჩნიათ. ისინი არაფერს ეფუძნება, მათ არ გააჩნიათ საბაზისო აქტივი, რომელიც უსაფრთხოების გარანტის როლს შეასრულებს.“

ციფრული ევრო კი პირიქით, ევროპის ცენტრალური ბანკის რეზერვებითა და კომპეტენციით იქნება უზრუნველყოფილი – ამბობს ლაგარდი. მისი მტკიცებით – ეს იქნება სახელმწიფო ციფრული ვალუტის მომხმარებლების, ევროკავშირის ტრადიციული ფინანსური სისტემის უსაფრთხოების და საერთაშორისო ტრანზაქციების ეფექტურობის დაცვის გარანტი.

„იმ დღიდან, როცა ცენტრალური ბანკის ციფრული ვალუტა გვექნება, მე გარანტიას გაძლევთ, რომ თითოეული ციფრული ევრო  ცენტრალური ბანკის რეზერვებით იქნება უზრუნველყოფილი.“

ECB-ის ხელმძღვანელის აზრით, სახელმწიფო ციფრული ვალუტა კრიპტო აქტივებისგან ძირითადად ცენტრალიზებული მმართველი ორგანოს არსებობით განსხვავდება:

„CBDC-ს მხარს ცენტრალური ბანკი დაუჭერს და ვფიქრობ ეს ციფრულ ევროს ძალიან გამოარჩევს იმ კრიპტოვალუტებისგან, რომლებსაც არაფრის მხარდაჭერა არ აქვთ.“

ლაგარდის თქმით, მიუხედავად იმისა, რომ მას კრიპტოვალუტაში ინვესტიცია არასოდეს განუხორციელებია, ეს მისმა შვილმა გააკეთა – ინვესტიცია ციფრულ აქტივებში ჩადო.

გასულ კვირას ECB-ს აღმასრულებელი კომიტეტის წევრმა ფაბიო პანეტამ განაცხადა, რომ ცენტრალური ბანკი სახელმწიფო ციფრული ვალუტის გამოსაშვებად სრულიად მზად  2026 წლისთვის იქნება.