მაიამის მერი მაიამი კრიპტოვალუტის მსოფლიო დედაქალაქი უნდა გახდეს

მაიამის მერი ფრენსის სუარესი ქალაქში ხელსაყრელი პირობების შექმნას აპირებს კრიპტოვალუტების გამოყენებისა და სტარტაპების განვითარებისთვის.

ამის შესახებ ფრენსის სუარესმა Gemini-ს ბირჟის შემქმნელებთან – ტაილერ და კამერონ ვინკლვოსებთან ინტერვიუში განაცხადა. შეხვედრაზე მათ ბიტკოინისა და ბლოკჩეინის განვითარება, კრიპტოვალუტის ინდუსტრიის მომავალი და მისი რეგულირება განიხილეს.

სუარესმა არსებულ ეკონომიკურ პირობებში ბიტკოინი ერთ-ერთ ყველაზე სტაბილურ ინვესტიციად მოიხსენია. მან ასევე განაცხადა, რომ მისი მისიაა მაიამი ყველაზე კონკურენტუნარიანი ქალაქი გახდეს კრიპტოვალუტის სფეროში. ძმებმა ვინკლვოსებმა მის მისწრაფებებს მხარი დაუჭირეს.

„მაიამის მაცხოვრებლებიდან ბევრს ჰყავს ოჯახი საზღვარგარეთ. იმისთვის, რომ მათ ფული გადაურიცხონ, მაიამის მაცხოვრებლებს მეტი საკომისიოს გადახდა უწევთ. კრიპტოვალუტით სარგებლობა – იგივეა რაც გააგზავნო შეტყობინება ელექტრონულ ფოსტაზე. ეს უფასოა და სწრაფი,”- აცხადებს ტაილერ ვინკლვოსი.

სუარესის თქმით, მაიამი ყოველთვის იყო ცნობილი როგორც საბანკო და საფინანსო ცენტრი. ამიტომ მისი  კრიპტოვალუტის განვითარების „ინოვაციური ტექნოლოგიების კერად“ გადაქცევა აზრს არაა მოკლებული. ამ მხრივ მაიამი ჩამორჩება ნიუ-იორკს, თუმცა, გარკვეული ძალისხმევის საშუალებით შეუძლია მალევე დაეწიოს. ამის გარდა, სუარესი სწავლობს შესაძლებლობებს მაიამის მაცხოვრებლებმა კრიპტოვალუტით საშემოსავლო და სხვა სახის გადასახადების გადახდა შეძლონ.

„ჩვენ არ ვაპირებთ გავხდეთ კიდევ ერთი სილიკონის ველი ან ნიუ-იორკი. მაგრამ მაიამი უნდა იყოს არა მხოლოდ ფინანსური, არამედ კრიპტოვალუტის ცენტრიც. ჩვენ გვინდა, რომ ყველა, ვინც ჩვენს იდეებს იზიარებს, ჩამოვიდეს აქ და საკუთარი პროექტები განახორციელოს,“ – განაცხადა მაიამის მერმა.

წყარო https://bits.media/