მასკი კრიპტოვალუტის შენახვას გააგრძელებს

მასკი კრიპტოვალუტის შენახვას გააგრძელებს

ილონ მასკი: „მე BTC, ETH და DOGE-ს შენახვას გავაგრძელებ.“

Tesla-ს აღმასრულებელმა დირექტორმა, ილონ მასკმა ინფლაციის მზარდი ტემპის გამო შეშფოთება გამოხატა. თუმცა აღნიშნა, რომ BTC, ETH და DOGE-ს გაყიდვას არ აპირებს.

ილონ მასკმა Twitter-ის მომხმარებლებს სთხოვა გაეზიარებინათ თავიანთი მოსაზრებები, თუ რა დონეს მიაღწევს ინფლაცია მომდევნო რამდენიმე წლის განმავლობაში.

ტვიტს MicroStrategy-ის აღმასრულებელი დირექტორი მაიკლ სეილორი (Michael Saylor) გამოეხმაურა და საკუთარი მოსაზრება გამოთქვა.

მისი აზრით, აშშ დოლარის სამომხმარებლო ინფლაცია ყველა დროის მაქსიმუმისკენ სწრაფვას გააგრძელებს, ხოლო აქტივების ინფლაცია სამომხმარებლო ფასების ინფლაციის ზრდის ტემპს ორჯერ გაუსწრებს.

სუსტი ვალუტები დაეცემა, ამასთან  ნაღდი ფულის, სავალო ვალდებულებებისა და დაბალფასიანი აქციების სახით გაიზრდება კაპიტალის გადინება დეფიციტურ აქტივებში, როგორიცაა ბიტკოინი.

მასკი სეილორის მოსაზრებას ნაწილობრივ დაეთანხმა.

ის მიიჩნევს, რომ მაღალი ინფლაციის დროს უმჯობესია ფიზიკურ აქტივებში – უძრავ ქონებაში ან იმ კომპანიების აქციებში ინვესტირება, რომლებიც კარგ პროდუქტს აწარმოებენ.

მასკმა დასძინა, რომ ის კვლავ ფლობს BTC, ETH და DOGE-ს და მიუხედავად ბაზრის მდგომარეობისა მათ გაყიდვას არ აპირებს.

მასკის ტვიტის შემდეგ, მის მიერ ნახსენები კრიპტოაქტივების ფასებში მცირე ნახტომი დაფიქსირდა : DOGE  0,10$-დან 0,12$-მდე გაიზარდა, ETH  2,605$-ზე  შენარჩუნდა ხოლო BTC 38,909$-მდე გაიზარდა.

ამერიკელი ბიზნესმენი რობერტ კიოსაკი (Robert Kiyosaki) კრიპტოვალუტების მიმართ ასევე ოპტიმისტურად არის განწყობილი.

ის ყოველთვის ოქროში, ვერცხლსა და ბიტკოინში ინვესტიცრების მომხრე იყო და მათ ინფლაციისგან საუკეთესო დაზღვევად მიიჩნევდა.

Microsoft-ის თანადამფუძნებელმა ბილ გეითსმა (Bill Gates) კი ცოტა ხნის წინ ხალხი გააფრთხილა  თავი შეიკავონ ბიტკოინში ინვესტირებისგან, რადგან მისი აზრით, ამის უფლება თავს მხოლოდ მილიარდერებმა შეიძლება მისცენ. 

მან შესაძლებლობა არ გაუშვა ბიტკოინი იმის გამო გაეკრიტიკებინა, რომ მის კურსზე ზეგავლენის მოხდენა ილონ მასკის ერთ ტვიტს შეუძლია.