by shaksen 
მესტიაში კრიპტომაინინგის საქმეზე გამოძიება დაიწყო – პოლიციამ 148 მაინერი ამოიღო
საქართველოს შინაგან საქმეთა სამინისტროს ინფორმაციით, მესტიის მუნიციპალიტეტში ენერგორესურსით სარგებლობის წესების დარღვევის ფაქტებზე გამოძიება მიმდინარეობს. სამართალდამცველებმა ჩატარებული ოპერატიული ღონისძიებებისა და საგამოძიებო მოქმედებების შედეგად ექვს სხვადასხვა ლოკაციაზე კრიპტოვალუტის გამომმუშავებელი 148 ერთეული სპეციალური მოწყობილობა – ე.წ. მაინერი აღმოაჩინეს და ამოიღეს.
გამოძიების მონაცემებით, მოწყობილობების მფლობელები დიდი ოდენობით ელექტროენერგიას უკანონოდ მოიხმარდნენ და მისი გამოყენებით სისტემატურად ახორციელებდნენ კრიპტოვალუტის მაინინგს, რის შედეგადაც არალეგალურ შემოსავალს იღებდნენ.
შსს-ს ცნობით, ჩატარებული ჩხრეკების ფარგლებში ამოღებულია მნიშვნელოვანი რაოდენობის ტექნიკური აღჭურვილობა, რომელიც საქმეზე ნივთმტკიცებად არის მიჩნეული.
უწყების განცხადებით, გრძელდება აქტიური საგამოძიებო მოქმედებები დანაშაულში შესაძლო მონაწილე სხვა პირების გამოვლენისა და პასუხისმგებლობის საკითხის დასადგენად.
საქმეზე გამოძიება საქართველოს სისხლის სამართლის კოდექსის 229-ე პრიმა მუხლის მე-2 ნაწილის „ბ“ ქვეპუნქტით მიმდინარეობს. აღნიშნული დანაშაული სასჯელის სახით სამ წლამდე ვადით თავისუფლების აღკვეთას ითვალისწინებს.
