მსხვილი კრიპტობირჟები შესაძლოა ინსაიდერულ ვაჭრობას ეწეოდნენ

 მსხვილი კრიპტობირჟები შესაძლოა ინსაიდერულ ვაჭრობას ეწეოდნენ

საკონსულტაციო სააგენტო Argus-ის ანალიტიკოსები ეჭვობენ, რომ შესაძლოა Binance-ის, FTX-ისა და Coinbase-ის თანამშრომლები კრიპტოვალუტის ლისტინგების შესახებ საიდუმლო ინფორმაციის გაცემის სანაცვლოდ ფულს შოულობენ.

Argus-ის მიერ გამოქვეყნებულ ანგარიშში ნათქვამია, რომ ზოგიერთი კრიპტოვალუტის საფულის აქტივობის შესწავლის შედეგად გაირკვა, რომ  მფლობელებს ინსაიდერული ინფორმაციის გამოყენება შეეძლოთ. 

ანგარიშის ავტორები ირწმუნებიან, რომ საფულეების მფლობელებმა ციფრული აქტივები სავაჭრო პლატფორმებზე შესვლამდე რამდენიმე დღით ადრე შეიძინეს.

ლისტინგის შემდეგ კი მათ აქტივები მაშინვე გაყიდეს და ამ მანიპულაციებით დიდი თანხები გამოიმუშავეს.

მკვლევარების მონაცემებით, საფულის ერთ-ერთმა მფლობელმა აგვისტოში 360 000 დოლარის კრიპტოვალუტა Gnosis შეიძინა,

შვიდი დღის შემდეგ სავაჭრო პლატფორმამ Binance ამ კრიპტოვალუტის ლისტინგის შესახებ გამოაცხადა.

ინფორმაციამ ბირჟაზე Gnosis-ის ლისტინგის შესახებ ციფრული აქტივის ფასი რვაჯერ გაზარდა.

ლისტინგიდან ფაქტიურად ოთხი წუთის შემდეგ, აღნიშნული საფულის მფლობელმა კრიპტოვალუტის გაყიდვა დაიწყო და 24 საათში აქტივი მთლიანად მოიშორა . კრიპტოვალუტით მანიპულირებამ საფულის მფლობელს საშუალება მისცა 500,000$ მიეღო (140,000$ წმინდა მოგება).

Argus-ის ანალიტიკოსების თქმით, ეს არ არის პირველი შემთხვევა, როდესაც საფულის ამ მისამართზე საეჭვო აქტივობა ვლინდება.

ექსპერტების განცხადებით, სულ გამოვლენილია მსგავსი აქტივობის 46 საფულე.

ანალიტიკოსების აზრით, საფულის მფლობელებმა  კრიპტოვალუტები შეიძინეს მანამ, სანამ მათ ძირითად სავაჭრო პლატფორმებზე განათავსებდნენ, როგორიცაა Binance, FTX და Coinbase. Argus-ის გამოთვლებით, ამ მისამართებზე აქტივების გაყიდვიდან 1,7 მილიონ დოლარზე მეტი შევიდა.

Argus-ის ანალიტიკოსების განცხადების საპასუხოდ, კრიპტოვალუტის ბირჟებმა FTX და Binance განაცხადეს,

რომ მათი პერსონალი  ინციდენტებში არ მონაწილეობდა. პლატფორმები ირწმუნებიან, რომ თანამშრომლებს ინსაიდერული ინფორმაციის საფუძველზე აქტივების ყიდვა და გაყიდვა ეკრძალებათ.

შეგახსენებთ, რომ ცოტა ხნით ადრე, აშშ-ს ფასიანი ქაღალდების კომისიის (SEC) თავმჯდომარემ გარი გენსლერმა განაცხადა, რომ კრიპტო ბირჟები ხშირად თავიანთი კლიენტების წინააღმდეგ თამაშობენ.