დიდ კომპანიებს ანგარიშსწორება სტეიბლკოინებში ურჩევნიათ

დიდ კომპანიებს ანგარიშსწორება სტეიბლკოინებში ურჩევნიათ

კომპანია RocketFuel Blockchain-ის აღმასრულებელი დირექტორის პიტერ ჯენსენის განცხადებით, დიდი ორგანიზაციები საერთაშორისო გადახდებისა და ანგარიშსწორებისთვის სტეიბლკოინებს სულ უფრო ხშირად იყენებენ.

პიტერ ჯენსენმა (Peter Jensen) სტეიბლკოინების უპირატესობა იმით ახსნა, რომ მთელ მსოფლიოში, განსაკუთრებით კი შეერთებულ შტატებში, კრიპტოვალუტების რეგულირება გაურკვეველია. ეს უბიძგებს კომპანიებს გამოიყენონ სტეიბლკოინები, რომლებსაც არასტაბილური ბიტკოინისა და ეთერიუმისგან განსხვავებით, შედარებით სტაბილური ფასი აქვთ. სტეიბლკოინები განსაკუთრებული მოთხოვნით სარგებლობენ მსხვილ და ავტორიტეტულ კომპანიებში, რომლებიც ტრანსსასაზღვრო გადარიცხვებს ახორციელებენ.

„თუ კომპანიას გერმანიაში თავისი შვილობილი კომპანიისთვის 1 მილიონი დოლარის გადარიცხვა სჭირდება, ის იძულებულია სტეიბლკოინებს მიმართოს, რადგან ისინი ნაკლებად ვოლატილურია. კომპანიები, რომლებიც მრავალმილიონიან ან მილიარდიან ტრანზაქციებს ახორციელებენ, ფულის A წერტილიდან B წერტილში გადასატანად ყველაზე ეფექტურ გზებს ეძებენ “- აღნიშნა RocketFuel-ის აღმასრულებელმა დირექტომა.

ჯენსენი დარწმუნებულია, რომ სტეიბლკოინების დანერგვის ზრდა აუცილებლობით არის განპირობებული. კომპანიები აცნობიერებენ, რომ მათი თანხები სტეიბლკოინების მეშვეობით ბევრად უფრო იაფად და სწრაფად გადაირიცხება, ვიდრე ათწლეულების მანძილზე გამოყენებული მეთოდებით. ჯენსენის აზრით, სტაბილური მონეტების მიღება „ქსელური ეფექტის“ ხარჯზე გაიზრდება.

„ქსელური ეფექტის კარგი მაგალითი Facebook გახდა. როგორც კი თქვენმა მეგობრებმა მასზე საუბარი დაიწყეს თქვენ ამ პლატფორმაზე დარეგისტრირდით, რადგან მათი ფოტოების ნახვა გინდოდათ. იგივე ხდება სტეიბლკოინებთან დაკავშირებით – თუ თქვენი პარტნიორები მათ იყენებენ, თქვენ ასევე გამოიყენებთ მათ გადახდის მეთოდად“ – თქვა ჯენსენმა.

თუმცა იმაზე, რომ სტეიბლკოინებს მხოლოდ უპირატესობები გააჩნიათ ყველა არ თანხმდება. მაგალითად, ბლოკჩეინ Cardano-ს დამფუძნებელი ჩარლზ ჰოსკინსონი (Charles Hoskinson) მიიჩნევს, რომ სტეიბლკოინები ხელს უწყობს კრიპტოვალუტების ცენტრალიზაციას, რაც მათ კონცეფციას ეწინააღმდეგება.