მხოლოდ ბიტკოინი – სალვადორი სხვა კრიპტოვალუტები არა

მხოლოდ ბიტკოინი – სალვადორი სხვა კრიპტოვალუტები არა

ცოტახნის წინ სალვადორმა ბიტკოინი გადახდის საშუალებად დააკანონა. თუმცა ქვეყნის პრეზიდენტის, ნაიბ ბუკელეს
განცხადებით მსგავსი პატივი არცერთ სხვა კრიპტოვალუტას აღარ ერგება.

პოდკასტ What Bitcoin Did ავტორთან, პიტერ მაკკორმაკთან (Peter McCormack) ინტერვიუს დროს ბუკელემ განაცხადა,
რომ უკვე ორი გადახდის საშუალების მხარდაჭერაც კი ძალიან ძნელია:

„შეუძლებელია ასეთი სტატუსი ათ აქტივს მისცე, ორი კანონიერი გადახდის საშუალება – ეს უკვე ძალიან რთულია.
ამიტომ იქნება მხოლოდ ბიტკოინი და აშშ დოლარი.“

ამასთან სალვადორის პრეზიდენტმა ხაზი გაუსვა, რომ ქვეყანაში არ იკრძალება ალტერნატიული კრიპტოვალუტების გამოყენება.
პირიქით, ბუკელემ მიმართა კრიპტოვალუტის სტარტაპებს, რომ სალვადორში გახსნან ფილიალები ან ბიზნესი 0-დან დაიწყონ.

კითხვაზე, თუ რატომ გადაწყვიტა სალვადორის მთავრობამ ბიტკოინის გამოყენება და არა საკუთარი კრიპტოვალუტის შექმნა
(ქვეყანაში ოფიციალური ვალუტა აშშ დოლარია) ბუკელემ უპასუხა, რომ ამჟამად მოსახლეობის 70%-ს საბანკო ანგარიში არ გააჩნია.

„ბანკებმა ვერ მოიცვეს მოსახლეობის უდიდესი ნაწილი, ამიტომ იმის ნაცვლად, რომ  წარსულში დავრჩეთ, გადავწყვიტეთ ინოვაციები შემოგვეტანა. ბიტკოინის გამოყენება კარგია არა მხოლოდ ჩვენთვის, არამედ მთელი კაცობრიობისთვის. ეს მთელი კაცობრიობისთვის დიდი ნახტომია. თუ ჩვენ, კონტინენტზე ყველაზე პატარა ქვეყანას შეგვიძლია ეკონომიკური რევოლუციის სათავეში მოვექცეთ, რატომ არ უნდა ვცადოთ?“- განაცხადა სალვადორის პრეზიდენტმა.

ბიტკოინს სალვადორში გადახდის საშუალების სტატუსი ივნისის დასაწყისში მიენიჭა. ეს ყველას არ მოსწონებია. მაგალითად, მსოფლიო ბანკმა ქვეყანას ფინანსურ სისტემაში კრიპტოვალუტების ინტეგრაციაში დახმარებაზე უარი უთხრა.

 

წყარო: https://bits.media

მხოლოდ ბიტკოინი – სალვადორი სხვა კრიპტოვალუტები არა