პაკისტანი ტრანზაქციების ზედამხედველობის სააგენტოს აყალიბებს

პაკისტანი ტრანზაქციების ზედამხედველობის სააგენტოს აყალიბებს

პაკისტანის ფინანსთა სამინისტრომ მხარი დაუჭირა დამოუკიდებელი სააგენტოს შექმნას, რომელიც ბლოკჩეინსა და კრიპტოვალუტებს გააკონტროლებს. სააგენტოს სახელწოდება „პაკისტანის ციფრული აქტივების ორგანო“ (PDAA) იქნება.

PDAA-ს კრიპტოვალუტის ბირჟებთან, კასტოდიალურ სერვისებთან, ციფრულ საფულეებთან, აქტივების ტოკენიზაციის პლატფორმებთან, სტაბილურ კოინებთან და დეცენტრალიზებულ ფინანსურ (DeFi) პროტოკოლებთან დაკავშირებული ტრანზაქციების კონტროლი დაევალება. სააგენტო მონიტორინგს კრიპტო სერვისების ადგილობრივ კანონმდებლობასთან შესაბამისად განახორციელებს.

პაკისტანის ფინანსთა მინისტრის, მუჰამედ აურანგზების (Muhammad Aurangzeb) განცხადებით, PDAA ფინანსური ინოვაციების განვითარების სტრატეგიის ნაწილია.

„პაკისტანს კრიპტოინდუსტრიის რეგულირება არა მხოლოდ სხვა ქვეყნების დასაწევად, არამედ იმისთვის სჭირდება, რომ თავად გახდეს ბაზრის ლიდერი. ახალი სააგენტო მომხმარებლების დაცვას, გლობალური ინვესტიციების მოზიდვას და ციფრული აქტივების განვითარებისთვის საფუძვლის შექმნას შეუწყობს ხელს.“- განაცხადა აურანგზებმა.

კრიპტოვალუტის ბაზრის ზედამხედველობის გარდა მოსალოდნელია PDAA-ს ეროვნული აქტივების ტოკენიზაციასთან და სახელმწიფო ვალთან დაკავშირებული საკითხების მოგვარება დაეკისროს. სააგენტოს ასევე მოუწევს დაეხმაროს ბიტკოინის მაინერებს ჭარბი ელექტროენერგიის ათვისებაში.

მიმდინარე წლის გაზაფხულზე პაკისტანის ენერგეტიკის მინისტრმა ავაის ლეგარიმ (Awais Leghari) მოლაპარაკებები პაკისტანის ახლადშექმნილი კრიპტოვალუტის საბჭოს (PCC) აღმასრულებელ დირექტორთან, ბილალ ბინ საკიბთან (Bilal Bin Saqib) გამართა. ოფიციალურმა პირებმა განიხილეს, თუ როგორ შეეძლოთ საერთაშორისო მაინინგ კომპანიებს ჭარბი ელექტროენერგიის გამოყენება.