პოლონეთი კრიპტო ანგარიშებს დაბლოკავს

პოლონეთი კრიპტო ანგარიშებს დაბლოკავს

პოლონური მარეგულირებელი კრიპტოვალუტის ანგარიშების დაბლოკვის უფლებას ითხოვს. პოლონეთის ხელისუფლებამ მოამზადა კანონპროექტი, რომელიც ფინანსური ზედამხედველობის ორგანოს (KNF) მიანიჭებს უფლებას დაბლოკოს კრიპტოვალუტის ის ანგარიშები, რომელთა მფლობელები სააგენტოს მხრიდან დანაშაულებრივ ქმედებებში იქნებიან ეჭვმიტანილი.

კანონპროექტი ციფრული აქტივებით ვაჭრობასა და კრიპტოვალუტის სერვისების მიწოდების ზედამხედველობაზე KNF-ის უფლებამოსილებებს აფართოებს. თუ დოკუმენტი პარლამენტმა დაამტკიცა, დეპარტამენტს კრიპტოვალუტის მფლობელთა ანგარიშების 96 საათის ვადით (ოთხი დღით) დაბლოკვის უფლება მიენიჭება.

ანგარიშის დაბლოკვის საფუძვლად საკმარისი იქნება მხოლოდ ეჭვის არსებობაც, რომ ესა თუ ის გარიგება თეორიულად შესაძლოა კრიმინალურ აქტივობას უკავშირდებოდეს. პროკურატურის თანხმობით კი, ბლოკირების ვადა შესაძლოა ექვს თვემდეც გაგრძელდეს.

კრიპტო ტრეიდერმა, ანალიტიკოსმა და პოლონური ფინანსური პორტალის Comparic-ის მთავარმა რედაქტორმა არკადიუშ იუზვიაკმა (Arkadiusz Jóźwiak) კანონპროექტს წინააღმდეგობრივი ინიციატივა უწოდა იმ ფონზე, როცა რამდენიმე წლის წინ პოლონეთის ხელისუფლებამ კრიპტოვალუტებით ტრანზაქციებზე 19%-იანი გადასახადი შემოიღო.

„იმ არაკეთილგანწყობის გათვალისწინებით, რომელსაც KNF კრიპტოვალუტების მიმართ კვლავ ავლენს, მხოლოდ ეჭვების გამო ანგარიშების დაბლოკვა გადაჭარბებულია.“- განაცხადა ტრეიდერმა.

იანვარში პოლონეთის ხელისუფლებამ გამოაცხადა, რომ 2024 წელს კრიპტოვალუტებისთვის მარეგულირებელ ბაზას შეიმუშავებს, რაც ევროკავშირის კრიპტოვალუტის აქტის (MiCA) ადგილობრივ სამართლებრივ ჩარჩოში ინტეგრაციის შესაძლებლობას შექმნის.

კანონდარღვევის შემთხვევაში, მარეგულირებელი კრიპტოვალუტის ბაზარზე მოქმედი კომპანიებისთვის ფინანსური სანქციების დაწესებას და სასამართლოს წარმართვას შეძლებს.