პროკურატურა ბენკმენ-ფრიდისთვის 11 მილიარდი დოლარის ჯარიმას და 50 წლიან პატიმრობას ითხოვს
პარასკევს, 15 მარტს, ნიუ-იორკის სამხრეთ ოლქის იუსტიციის დეპარტამენტის ოფისმა FTX Group-ის ყოფილი ხელმძღვანელის საქმეზე განაჩენის გამოცხადებასთან დაკავშირებით გამართულ საბოლოო მოსმენებზე აშშ-ს პროკურატურის ოფიციალური პოზიცია გაახმოვანა.
სამართალდამცავები დარწმუნებულები არიან, რომ სემ ბენკმენ-ფრიდი (Sam-Beckman-Fried) კანონის საწინააღმდეგოდ მოქმედებას აცნობიერებდა, მაგრამ ამის იგნორირება გადაწყვიტა.
„ბიზნესმენი ატყუებდა ინვესტორებს, აყალბებდა დოკუმენტებს და ჩვენს პოლიტიკურ სისტემაში მილიონები შეჰქონდა. პროკურორები მიიჩნევენ, რომ ჩადენილი დანაშაულისთვის შესაბამისი სასჯელი 40-დან 50 წლამდე ვადით თავისუფლების აღკვეთა, ასევე ქონების კონფისკაცია და 11 მილიარდი დოლარის ოდენობის ჯარიმა იქნება. ბენკმენ-ფრიდი ამ ისტორიულ თაღლითობაში მისი როლის პროპორციულ მკაცრ სანქციებს იმსახურებს.“ – ნათქვამია ოფიციალურ განცხადებაში.
ნაფიცმა მსაჯულებმა კრიპტო ბირჟა FTX-ის თანადამფუძნებელი სემ ბენკმენ-ფრიდი მის წინააღმდეგ წაყენებულ ყველა ბრალდებაში დამნაშავედ 2023 წლის 2 ნოემბერს ცნეს.
დაცვის მხარე სასამართლოსგან სასჯელის შემცირებას დაჟინებით მოითხოვდა, რადგან მათი აზრით, პროკურორების მიერ თავდაპირველად მოთხოვნილი 110 წლიანი პატიმრობა „ბარბაროსული იყო იმ პირის მიმართ, რომელმაც არაძალადობრივი დანაშაული პირველად ჩაიდინა.“
ბენკმენ-ფრიდისთვის საბოლოო განაჩენის გამოტანა 28 მარტს არის დაგეგმილი.
- გამოგვეყვით ტელეგრამზე t.me/cryptonewsgeorgia
- დაემატეთ ჩვენს ჯგუფში Fb.me/groups/cryptonewsgeorgia
Comments (No)